USA-p Iranimi sorsunneq naammassippat Nato-mut illersornissamut isumaqatigiissuteqarnerminik nalilersuisariaqarnissaa ilimanarsivoq.
USA-p nunanut allanut ministeria Marco Rubio tv-qarfimit Fox Newsimit apersorneqarluni taama oqarpoq.
- Ajoraluartumik akerleriittoqareerpat pissutsit nalilersortariaqartut qularutissaanngilaq, Rubio oqarpoq.
Nato-mut ilaasortaaneq pillugu aalajangiinissaq USA-p præsidentiata Donald Trumpip nammineq aalajangissagaa aamma oqarpoq.
Nunanut allanut ministerip NATO-mut ilaasortaaneq siornatigut tapersersortuarsimallugu oqaluttuarpoq.
Taamani Republikanerit sinnerlugit 2011-miit 2025-mut senatimi ilaasortaavoq.
Rubiop ingammik USA-p Europami sakkutooqarfiit atorsinnaanerat naleqangaartutut isigalugu nassuiaavoq. Rubio naapertorlugu sakkutooqarfiit taakku iluaqutigalugit USA nunarsuup ilarujussuani pissaaneqarnerulersimavoq.
Iranimi sorsunneq pissutigalugu Europami nunat arlallit Amerikamiut sakkutuuisa sakkutooqarfinnut isersinnaanerat killilerpaat.
Tassaapput Italia Spanialu.
- Maannakkut Nato-mut ilaasortaagatta sakkutooqarfik atorsinnaajunnaarutsigu — USA-p soqutigisaanik illersuinermut atorsinnaajunnaarutsigu — taava Nato ataasiinnarmik attaveqarpoq, Marco Rubio oqarpoq.
USA-p Natomi suleqatini Iranimut timmisartumik saassussinissamut peqataaqqullugit qinnuiginngikkai, taamaallaat sakkutooqarfinnik atuisinnaanissaannik qinnuigigai USA-p nunanut allanut ministeria nassuiaavoq.
- Naaggaarput. Sooq taava Nato-miippugut? Taama apeqquteqartariaqarpugut, Marco Rubio oqarpoq.
USA-p Israelillu Iranimik saassunertik februaarip 28-ani aallartippaat.
Donald Trump naapertorlugu Iranip atomimik qaartartunillu igeriuttakkanik USA-mut anngunneqarsinnaasunik sakkussiaqalernissaa pinngitsoortinniarlugu taamaaliortoqarpoq.
Iranip akissuteqarluni Kangiani Qiterlermi qaartartut igeriuttakkat dronillu atorlugit saassussivoq, sorsunnerlu nunap immikkoortuini tamani akerleriissutaalersimavoq.
USA-p Iranimut sorsunnini sapaatit akunneri marluk pingasulluunniit ingerlaneranni unitsissinnaagaa Trump marlunngornermi oqarpoq.
/ritzau/AFP
