Inuit marluk Nuup eqqaani qamuteralatsillutik aputip sisoorneranit matoorunneqartut ataasinngornermi annaanneqarput. Annaassiniaaneq annertuvoq sumiiffimmilu Ammukariamik taaneqartumiittoq, illoqarfiup avannaata kangianiittumut qamuteralannik minutsinik 15-inik ungasitsigisumi, politiit ataasinngornermi ualikkut ilisimatitsipput.
SAR Qamutit ajutoortut marluk apummit assaavigineqarneranni pisoq Facebookikkut saqqummiuppaat.
SAR Qamutit tassaapput qamuteralannik peqatigiiffimmit Qamutinit pilersinneqartoq, namminnerlu kajumissutsiminnik ujaasinermi oqartussaasunut annaassiniarnermilu ikiuuttarput.
Ajaappissat apummi ujaasissutit inoraat
SAR Qamutit innuttaasut ilaata ajutoornermik kalerrisaarimmat politiit attaveqarfigineqartut allapput. Ajutoortut marluk qujanartumik aputip sisoornerani kalerrisaarunik atortullit aputip ataani sumiinnersut paasineqartut SAR Qamutit allapput:
- Ajaappissat 2,5 meterisut takissusillit inuit matoorussaaqqasut angusinnaanngimmassut assaasoqartariaqarsimavoq, Facebookimi qupperneerminni allapput.
Inuk siulleq aputip iluani meterinik pingasunik itissusilimmi nassaarineqarpoq, tamatumalu kingorna aappaata ujarnera aallartippoq, taannalu aputip iluani meterit sisamat tallimat missaannik ititigisumi nassaarineqarpoq.
- Suleqatigiilluarneq ataqatigiissaarilluarnerlu pissutigalugit uumavoq
Inuit 20-30-t assaaqataasut SAR Qamutit allapput, taakkulu tamaasa qujaffigalugit:
- Inuit taakku marluk ikiuuttut tamarmik sukkaannaq , sunniuteqarluartumik ataqatigiissaarilluartumillu suleqatigiinnerisigut annaanneqarput, annaassiniaasartut allapput, imalu eqqaasitsissuteqarlutik:
- Nunap qaavaaniittoq aput suli sisoorsinnaanera eqqaasitsissutigerusupparput. Sisoortoqartillugu kalerrisaarut, ajaappissat peqitertakkat, nivaataq sisoortoqartillugulu nassatassaq puigunngisaannakkit – kisimiitillutillu angalassanngilatit.
Annaassiniartartut oqaluttuarnerat Facebookimi qupperneranni atuarneqarsinnaavoq:
