Savalimmiuni naalakkersuisunngortitsinissamut isumaqatigiinniarnerit sisamanngornermi tallimanngornermilu sivikitsumik unikkallaqqareerlutik arfininngornermi nangeqqinneqarput.
Isumaqatigiinniarnerit Savalimmiut nalunaaqutaat malillugu nal. 10.30 aallartittussaagaluartut, tassa Kalaallit Nunaanni nal. 8.30,Savalimmiuni tusagassiorfik dagur.fo allappoq.
Partiimi konservativimi Fólkaflokkurinimi siulittaasoq Beinir Johannesen naalakkersuisunngortitsinissamik isumaqatiginninniarnernut siuttuusussatut toqqarneqarpoq.
Partiit Sambandsflokkurin aamma Javnaðarflokkurin ataasinngormalli isumaqatigiinniarfigai.
Naalakkersuisunngortussat tunngavissaat poorskip sapaataa nallertinnagu naammassineqassasoq Beinir Johannesenip neriuutigalugu siusinnerusukkut oqaatiginikuuaa.
- Missingersuut naammassingajalertoq isumaqarpunga, Savalimmiuni radiokkut FM1-imi apersormeqarluni oqarpoq, nangipporlu:
- Innuttaasunut iluaqutaasunik ataavartumik aaqqiissutissanik pilersitsisinnaasunik Savalimmiunut siammasissumik naalakkersuisoqarnissaa pingaaruteqartoq aamma isumaqarpunga.
Sapaammi ataasinngornermilu isumaqatigiinniarnerit unikkallaqqeriarlutik marlunngorpat aamma nangeqqissapput.
Partiit pingasut amerlanerussuteqarluinnartut
Naalakkersuisunik nutaanik pilersitsinissaq kingusinnerpaamik apriilip qulingani pissasoq Beinir Johannesenip aallaqqaamut anguniaraluarpaa.
Savalimmiuni inatsisartunut, Lagtingimut, sapaatip-akunnerani kingullermi sisamanngornermi qinersisoqarpoq.
Tassani Folkeflokkurin 26,7 procentit taaneqarlutik partiini qinerneqarnerpaavoq, qulingiluanillu ilaasortaatitaqarlutik.
Sambandsflokkurin arfineq-marlunnik Javnaðarflokkurinilu arfinilinnik ilaasortaatitaqalerput.
Taamaalillutik partiit taakku pingasut naalakkersuisoqatigiilissagunik 24-nik ilaasortaqarlutik amerlanerussuteqalissapput.
Lagtingimi politikerit 33-upput.
Savalimmiuni qinersisoqarnissaata tungaanut Javnaðarflokkurin lagmandiujunnaartoq Aksel V. Johannesen siuttoralugu naalakkersuisuni siuttuuvoq.
Taanna 29-nik ukiulimmut Beinir Johannesenimut, Savalimmiuni lagmandinngortussatut naatsorsuutigineqartumut, akkaajuvoq.
Savalimmiuni partiit arfineq-marluk qinersisoqareernerata kingorna ilaasortaatitaqalerput, qinersisinaasuni 39.000-iusunit amerlanerusuni 89,5 procentii taasiartorput.
