Kinguaariit tulliuttut Tunumi qilalukkanik qernertanik qaqortannillu pisassaqartikkumallugit NAMMCO qilalugartassiisoqannginnissaanik maanna innersuussuteqarpoq.
Innersuussulli Siumumit isumaqatigineqaranilu ernummatigineqarpoq.
Taama partii Naalakkersuisunut ammasumik allagaqarpoq.
Pinngortitaleriffik Tunumi qilalugarniarnermut tunngatillugu siunnersuinermigut NAMMCO-p innersuussutaanik tunngavilersuuteqartaraluartoq pisassiissutit Naalakkersuisut aalajangertarpaat.
- Uumasunik pisuussutinik piujuartitsisumik aqutsineq pisariaqartoq, aammalu
kinguaariinnut tulliuttunut piujuaannartitsinissamik kissaateqarneq isumaqatigineqartoq Siumut isumaqarpoq. Taamaattorli pisaqannginnissamik aalajangiineq, sinerissami inuiaqatigiinnut annertuumik sunniuteqartussaq, naammattumik uppernarsarneqarlunilu ersarissumik tunngaveqanngitsoq akuersaarneqarsinnaanngilaq, Siumut allappoq.
Tunumi qilalukkat qernertat kulturikkut inuiaqatigiillu aningaasaqarnerannik pingaaruteqarnera tikkuarpaat. Qilalugarniartarunnaarneq inuuniarnermut, nerisassanut ileqqunullu annertuumik kinguneqarumaartoq isumaqarput. Taamaammat taama annertutigisunik aalajangiisoqassappat paasissutissat tutsuiginartut tunngavigalugit aalajangiisoqartariaqarpoq.
Qulimiguullit atorlugit kisitsineq naammanngitsoq
Siumup pisassiissutinik ilanngaatiginninnginnermut kisitsisit sorliit tunngaviunersut, aamma kisitsisit qanoq atorneqarsimanersut, kisitsinermilu nalorninartorsiortoqarsinnaanera ilanngullugu paaserusuppaa.
Aammali naliliinerit ilaatigut qulimiguulimmik misissuinermik tunngaveqartut allassimavoq. Periuseq kisitsinerliornermik kinguneqarsinnaasoq Siumut isumaqarpoq.
- Isumaqarpugut Kalaallit Nunaat periutsinik misilittagaqarfiulluartunik nunanilu tamalaani akuerisaasunik atuilertariaqartoq. Tassunga atatillugu JCNB-p suliaa innersuussutigaarput, tassani qilalukkat qaqortat qernertallu pillugit naliliinerit periutsinik aaqqissuussaanerusunik atorneqarlutik ingerlanneqartarput.
- Isumaqarpugut pisuussutinik akisussaassuseqartumik aqutsineq ilisimatusarneq, najukkani ilisimasaqarneq kulturimullu ataqqinninneq akornanni oqimaaqatigiissumik ingerlanneqartariaqartoq. Taamaattumik pisaqannginnissamik aalajangiineq naammattumik tunngaveqanngitsumik aalajangerneqartariaqanngilaq.
NAMMCO (North Atlantic Marine Mammal Commission) Kalaallit Nunaata, Savalimmiut, Islandip Norgellu akornanni miluumasut imarmiut pillugit suleqatigiinnermut qitiusumik 1992-imiilli suliniaqatigiiffiuvoq.
Suliniaqatigiiffiup immami uumasut ilisimatuussutsikkut tunngavilersorluakkatut piujuartitsisumillu aqunneqarnissaat sulissutigisarpaa, taamaalillunilu FN-ip imarpik pillugu nunarsuaq tamakkerlugu anguniagaanut kaannersuarnillu atuukkunnaarsitsinissamut toqqaannartumik tapersersuisarpoq.
