Nalunaaquttap ingerlaarfia pillugu oqallinneq marlunngormat naammassineqartussangagaluarpoq. Inatsisit pillugit ataatsimiititaliaq Naalakkersuisunit tapersersorneqartumik siunnersuuteqarsimavoq.
Inatsisartunili oqallinnermi Bo Martinsenip (D) immikkoortut pingajussaaneerneqartinnagit inatsisinut ataatsimiititaliamut utertinneqassasut nikuilluni siunnersuutigaa.
Bo Martinsen nammineerluni Inatsisinut Ataatsimiititaliami ilaasortaavoq, taamaammallu maannakkut nalunaaquttap ingerlaarfia atuinnarneqassasoq aasaaneranili nalunaaqutaq atorunnaarsinneqassasoq innersuusseqataasimavoq. Taamaakkaluartoq ataatsimiititaliami sivisunerusumik suliaqarnissamik noqqaassuteqarpoq.
- Tunngaviatigut suli suliassaqangaatsiartugut isumaqarpunga. Uanga aalajangiisuusinnaaguma immaqa tusarniaaqqissagaluarpugut, taanna Sermitsiamut oqarpoq.
Tusarniaasoqaqqissanersoq Inatsisinut ataatsimiititaliap aalajangiiffigisussaavaa, Bo Martinsenilli illoqarfinni anginerusuni inoqarfinnilu mikinerni inuit sapinngisamik amerlasuut tusarnaarneqassasut kissaatigaa.
- Nalunaaqutaq akunnermik ataatsimik allanngoraangat tamatta arlaatigut eqqugaasarpugut. Nalunaaquttap-akunnera ataasiinnaq pineqaannanngilaq. Inooriaaserput, aalisariartaaserput piniariartaaserpullu pineqarput.
- Tamatta eqqorneqartussaavugut. Aalisartut, piniartut, allaffimmiut, ilinniartitsisut, nakorsat, Danmarkimi nunanilu allani napparsimmavinni uninngasut eqqorneqassapput. Niuernerput eqqorneqassaaq. Tamatta eqqorneqassaagut. Kikkulluunniit arlaatigut eqqorneqassapput, Bo Martinsen oqarpoq.
Aasaanerani nalunaaqutaq qaqugu atorunnaarsinneqassava?
Nalunaaqutaq UTC-3-mut uteqqinniassammat akunnermik ataatsimik kinguartinneqassasoq Naleraq Siumullu siunnersuuteqarsimapput. Tamannali itigartitsissutigineqassasoq Inatsisinut ataatsimiititaliamit innersuutigineqarpoq.
Siunissamili ukiup affaani ataasiarluta nalunaaqutaq allanngortittariaqannginniassagatsigu aasaanerani nalunaaqutaq atorunnaarsinneqartariaqartoq partiit illuatungiliuttut Inatsisinullu Ataatsimiititaliap isumaqatigiissutigaat. Inatsisartut tamanna 2019-imili aalajangerpaat, EU-li utaqqisimavaat.
Naalakkersuisulli siulittaasuat Jens-Frederik Nielsen (D) aasaanerani nalunaaqutaq januaarip aallaqqaataani 2028-mi atorunnaarsinniarlugu piareersimallutik marlunngornermi oqarpoq.
Oqaluuserisassat ataatsimiititaliami suliarineqareerpata ataatsimiititaliap aalajangiinera suli atuutissanersoq apeqqutaaginnarpoq.
- Aasaanerani nalunaaqutaq atorunnaarsinniarlugu aalajangereerpugut. Inuiaqatigiinnut tamanut pitsaanerpaamik sunniuteqartussamik qaqugu qanorlu taamaaliorsinnaanerluta apeqqutaaginnarpoq, Bo Martinsen oqarpoq.
Kalaallit Nunaata aasaanerani nalunaaqutaq EU-mit siulliulluni atorunnaarsissappagu ukiukkut Danmarkimit akunnernik pingasunik aasakkullu akunnernik sisamanik kingulliusassaagut.
Nalunaaquttap ingerlaarfiata aalajangerneqarnissaa suliariumaneqanngitsoq
Pilersaarut malillugu oqaluuserisassat maajip 15-ianni pingajussaanik oqaluuserineqassapput. Ataatsimiititaliarli piffissaq eqqorlugu piareersimassanersoq piffissap takutikkumaarpaa, Bo Martinsen oqarpoq.
Oqallinnissaq kinguartinneqassappat tamanna nalunaaquttap ingerlaarfiata aalajangerneqarnissaanut siunnersuut aasit kinguartinneqaqqissaaq.
Oqaluuserisassat 2025-mi ukiakkut ataatsimiinnermi naammassineqartussaagaluarput, aappassaaneerneqarneralli ukiukkut ataatsimiinnermut kinguartinneqarpoq – tamannalu USA-mi pissutsit pillugit suliassarpassuaqartoqarnera pissutigalugu kinguartinneqarallarpoq. Oqaluuserisassat upernaakkut ataatsimiinnermi apriilip 14-iani oqaluuserineqartussanngortinneqarput, oqaluuserineqarnissaalli kinguartinneqassasoq Inatsisinut ataatsimiititaliap noqqaassutigaa.
Sooq tamanna taama aalajangeruminaatsigisoraajuk?
- Naluara suliariumaneqannginnersoq imaluunniit suunersoq. Kisiannili aamma assigiinngitsunut sunniuteqangaatsiartussaavoq.
- Aalajangigassaannaanngilaq. Tamanut sunniuteqartussaavoq. Taamaammat oqaluuserineqarnissaa aalajangiinissarlu pingaaruteqarluinnarpoq, Bo Martinsen oqarpoq.
Tamanut pitsaanerpaamik angusaqarnissaq ajornartoq taassuma nassuerutigaa, taamaaliussagaannili ataatsimiititaliaq piffissaqarnerusariaqarpoq.
