USA-p præsidentiata Donald Trumpip nunarput aqunniarniarlugu qanoq iliuuseqarusutsiginini oqaatigiumanngilaa.
Det Hvide Husimi tusagassiortunik katersortitsinermi tusagassiortumit aperineqarami nunarput tigujumallugu suna killissinnaanera ima akivoq:
- Takujumaarparsi.
Trumpip præsidentitut aappassaat atuuffimmini ukioq ataasinngortorsiornerminut atatillugu ullumi marlunngornermi tusagassiortunik katersortitsivoq.
Davosimi World Economic Forum-imi pingasunngornermi oqalugiarnissaa naatsorsuutigineqarpoq, tassani Kalaallit Nunaata aqunnissaanik kissaateqarnini sammissallugu oqaatigereerpaa.
- Kalaallit Nunaat pillugu ataatsimiinnerpassuit pilersaarutigaagut, isumaqarpungalu ingerlalluarumaartut, Trump tusagassiortunik katersortitsinermi oqarpoq.
USA-p præsidentia aamma aperineqarpoq nunarput aqulerumallugu nunat killiit sakkutooqarnikkut suleqatigiiffiat Nato suleqatigiunnaarumaneraa.
- Isumaqarpunga Nato-p nuannaarutigisinnaasaanik uaguttaaq nuannaarutigisinnaasatsinnik nassaassasugut, Trump oqarpoq oqaatigeqqillugulu USA-p “Kalaallit Nunaat pisariaqartikkaa isumannaallisaanikkut pissutsit pillugit”.
Sapaatip akunnerata naanerani Danmark Europamilu nunat arfineq-marluk allat siorasaarpai februaarip aallaqqaataani akitsuutinik qaffaanissamik, USA Danmarkilu nunarput pillugu isumaqatigiissuteqanngippata.
Aammattaaq nunat killermiut qallunaanit siulersorneqarlutik sakkutooqarnikkut sungiusarnermut atatillugu sakkutuunik nunatsinnut aallartitsisimasut isornartorsiorpai.
/ritzau/
