Qaqortoq sivisuumik utaqqisamik 7 kilometerisullu takitigisumik aqqusinilimmik 2016-mi apriilip 16-iani mittarfeqalerpoq. Biilertartulli arlallit mittarfiup ammarnerata kingorna paasisaattut aqqusinertaap ilaani mobilikkut attaveqaateqanngilaq.
Aqquserngup aallartinnerani attaveeruttarpoq, tamannalu mittarfimmut qanillinissap tungaanut kilometerialunni ajornartorsiutaasarpoq. Suli sivisuumik taamaassasoq Tusassimit oqaatigineqarpoq.
– Qaqortumiit mittarfimmut aqqusinermi attaveqaateqanngitsoq ilumoorpoq. Attaveqaatilli qulakkeerniarlugit 2026-pi ingerlanerani mobilikkut attaveqaasersuinissaq pilersaarutigaarput, attaveqatigiinnermut pisortaq Maasi Brøns Chemnitz oqarpoq.
Tusass aallaqqaammut sumiiffimmi tassani suliniutinik allanik isumaginnippoq.
– Siullermik illoqarfiup iluani attaveqaatit patajaannerulernissaat pitsaanerulernissaallu, tamatumalu kingorna mittarfimmi illuutit attaveqaatilerneqarnissaat qulakkeerneqartariaqarpoq. Tamatuma kingorna mittarfimmut aqqut attaveqaasersorneqassaaq, attaveqatigiinnermut pisortaq erseqqissaavoq.
Mittarfimmut aqqut borgmesteriusimasoq Henrik Lund atsiullugu pisortatigoortumik Henrik Lundip Aqqutaanik taaguuteqarpoq. MIttarfiup sananeqarnerani aqqut taanna nalinginnaasumik biilertunut killeqarnikuuvoq.
