Imigassartornermut tunngasunik politiit ulloq unnuarlu kingulleq ulapputeqartut, pigaartut pisortaat Aqqalu Petersen oqaluttuarpoq.
- Ulloq unnuarlu ulapaarfiuvoq. Ilaatigut angerlarsimaffinni eqqissiviilliornerit arfinillit, aqqusinermi eqqissiviilliornerit tallimat, aalakoorpallaartut inunnillu kissaatiginngisanik nalunaaruteqarnerit imminornissamik sioorasaarinerillu pillugit nalunaarutinik tigusaqarpugut, pigaartut pisortaat oqarpoq.
Aammattaaq Nuummi imigassartorsimalluni biilertoqarnera pillugu suliaq ingerlanneqarpoq, angut 50-it sinnerlugit ukiulik nalunaaqutaq 19.37 missaani politiinit unitsinneqarpoq.
Ulapaarneq nalinginnaanngitsumik ulapaarfiusutut pigaartut pisortaata oqaatigaa, sapaatip-akunnerata naanerani ulapinneq nalinginnaagajummat.
