Naaja H. Nathanielsen (IA) Anna Wangenheimilu (D) qineqqusaarnermik saniatigut Naalakkersuisunut ilaasortaanerat pissutigalugu folketingimut qinigassanngortittuni oqaluuserineqarnerpaat ilagaat.
Taakku marluullutik Nuummi illorsuarmi timersortarfimmi marlunngornermi ullaap tungaani qinersiartorneranni Sermitsiamit naatsumik oqaaseqartinneqarput.
Qinersineq una Kalaallit Nunaannut pingaaruteqarnera marluullutik eqqaavaat:
- Tamat oqartussaaqataanerisa ulluani nalliuttorsiorfiuvoq, folketingimut una qinersineq pingaarutilerujussuuvoq, Anna Wangenheim oqarpoq, nangillunilu:
- Nunat tamalaat akornanni ajornartooqqaneq pissutigalugu naalagaaffeqatigiinni attaveqarnerput unammillernarpoq, taamaammallu Kalaallit Nunaanni siunissarput pineqarluni. Avissaartuunneq tamanna illuatungilerusuppara.
- Ilungersunartumik inissisimavugut
Naaja H. Nathanielsen pissangalluni unnuaq sinnarlussimanerarpoq.
- Qinersineq nunatsinnut pingaaruteqarpoq. Qinigaasussat nunatsinnik sukataaruteqartuunissaat neriuutigaara. Partiini tamani piukkunnartunik qinigassanngortittoqartarpoq, oqarpoq, itisiliillunilu:
- Qaammatini kingullerni 14-ini nunatut ilungersunartumik inissisimavugut, tatineqarnerpullu USA-minngaanneerluni, aammali Danmarkimit allanillu. Kunngeqarfiup qanoq piniarnera erseqqissartariaqarnera pingaarteqartoq isumaqarpunga, tassa immitsinnut qanoq piniarnersugut.
Qinersisoqarluarnissaa neriuutigineqartoq
Anna Wangenheim qinersinerup pingaaruteqarnera eqqarsaatigalugu qinersiartortoqarluarnissaa neriutigaa:
- Folketingimut qinersinermi kingullermi taasiartortut 50 procentit ataappaat, tamannalu uggoraara. Taamaattumik qinigassanngortittut taama amerlatiginerat amerlanerusunik taasiartortoqarnissaannik malitseqarnissaa neriuutigaara, amerlanerusullu qinersinissap qanoq pingaaruteqartiginera takusinnaassagaat, oqarpoq.
Naaja H. Nathanielsen Folketingimi ilaasortanngortussat marluk kikkuusinnaasulluunniit isumaqarpoq:
- Inuit nuimasut soorlu Aaja Chemnitz aamma Aki-Matilda Høegh-Dam qinigassanngortinngillat, taamaammallu qinersisaat allanik taasisussaassallutik.
