- Aasianni raajanik suliffissuaq matuppat suliffeqarfiit amerlasuut eqqugaassapput

- Suliffissuaq Aasiannut pingaaruteqartorujussuuvoq. Matussappat Aasianni suliffeqarfippassuit suliffissuarmik kiffartuussisut aalisariutillu sakkortuumik eqqugaassapput. Tamanna qularutissaanngilaq. Taamaattumik suliffissuaq matuneqassanngitsoq neriuutigaarput, Søren Hansen, Qeqertarsuup Tunuani Sulisitsisuni siulittaasoq Sermitsiamut oqarpoq.

Taanna Blue Water Greenlandip Aasianni immikkoortortaqarfiani aaqqissuussinermut nassiussalerinermullu pisortaavoq.

Polar Seafoodip suliffeqarfiutaata Polar Raajat  illoqarfimmi raajalerivik aalisakkanillu suliffissuaq ukiaru matuneqassasoq, sapaatip akunnialuit matuma siornagut ilimasaarutigaa.

Naalakkersuisut politikikkut aaqqiissutissarsinngippata taama pisoqarumaarpoq, aalisakkanik suliffissuarmi Polar Seafood Greenlandimi pisortaaneq Bent Salling, Polar Raajani siulittaasuusoq oqarpoq.

Aasianni suliffissat nutaat amigaataasorujussuanngussasut

Aasianni inuit hunnorujut arlallit illoqarfimmi suliffeqarfiit annersaanni, Polar Raajat tunisassiorfianni 116-inik sulisulimmi, aamma suliffeqarfinni kiffartuussivinni sanaartorfinnilu suliffinni assigiinngitsuni sulinermikkut ullumikkut inuussutissarsiuteqarput.

Aasiaat 3.000-it missaannik inulik Kommune Qeqertalimmi illoqarfiit annersaraat, kommuni 6500-nik inoqarpoq.

Taamaattumik Søren Hansenip oqaatigaa, raajanik aalisakkanillu allanik suliffissuup Polar Raajat siulersuisui  ilimasaarutigisimasamittut tunisassiornermik taamalu aalisakkanik suliffissuarmik ukiap ingerlanerani matusissappata, illoqarfimmi suliffissat nutaat amigaataasorujussuanngussasut.  

Søren Hansen: - Ingerlatat annerupput 

Taassuma tikkuarpaa, illoqarfimmit takornariaqarfiusumit Ilulissanit allaanerulluinnarluni, Aasiaat suliffissuaqarfiusoq, aalisarnermik assartuinermillu pingaarnerpaamik inuussutissarsiuteqarfiulluni.

- Ingerlataq annertoorujussuugami. Immami ingerlanneqartut tamarmik illoqarfik Aasiaat napatippaat. Assersuutigalugu aalisariutit 150-it, umiatsiaaqqanit kutterinut anginerusunut, Polar Raajat suliffissuanut tunisisarput.

- Aasianni suliffeqarfippassuit aalisariutinik kiffartuussisarput. Suliffeqarfinni taakkunani aalisariutit nerisassanik uuliamillu pisisarput, iluarsaassassallu suliarineqartarlutik.  Aalisariutinilu inuttat illoqarfimmi taarserneqartarlutik, Søren Hansen oqarpoq.

 

Assersuutigalugu Aasianni Blue Water Greenlandimi, taassuma pisortaaffigisaani, raajarniutit suliffissuarmut usingiarneqartarput, sulisullu ilinniarsimanngitsut 12-it missaat suliamik tamatuminnga suliaqartarlutik.

- Taamaattumik suliffissuaq matuneqassappat Blue Waterimi sulisut suliffitsik annaasinnaavaat, oqarpoq.

160 millionit koruunit sinnerlugit nalilinnik 2025-mi tunitsivigineqartoq

Aasianni Polar Raajat raajanik, qaleralinnik, saarullinnik, saattuanik aamma nipisaat suaannik 140 millionit koruunit sinnerlugit nalilinnik siorna tunitsivigineqarpoq. Suliffissuarmi sulisut 100-t missaanniittut akileraarutinik 7 millionit koruunit missaanniittunik akiliisimapput.

Suliffissuarmut siorna tunisat katillugit 164 millionit koruuninik naleqarput. Taakkunannga qalerallit saarulliillu 17 millionit koruunit, saarulliit 4 millionit koruunit angullugit aamma nipisat suaat 1,5 millionit koruuninik nalillit tunineqarlutik. Taamaalilluni raajat tunisat tunisanit tamanit amerlanersaapput. 

Sulisut akissarsiaat katillugit 35 millionit koruuniupput, taakkunanngalu 2025-mi kommunimut akileraarutigisaat 7,3 millionit koruunit Kommune Qeqertalimmi akileraarutigineqarlutik. Aasianni suliffeqarfiit aalisakkanik suliffissuarmut sullissinerminni 28 millionit koruuninik kaaviiaartitaqarput.

Tamanna Polar Raajat Aasiannut aningaasatigut sunniutai pillugit naatsorsuinerup, Kommune Qeqertalimmi kommunalbestyrelsimut Namminersorlutillu Oqartussanut nassiunneqarsimasumi, erserpoq.