Amerikamiu imermik suliniummut aningaasaliisoq uissuummisitsisoq

– Ukiorpassuarni suleqatissatsinnik eqqortunik nassaarniarsimanerput isertugaanngilaq, suliniutillu ingerlallualersinniarnera ajornartorujussuusimavoq.

Pisortaq Jørgen Wæver Johansen, Svend Hardenberg 2016-imili peqatigalugu Qeqertarsuarmi imermik Uunartuarsummeersumik niueruteqarniarluni suliaqartoq, oqarpoq.

Tamatuma ajornakusoortorujussuusimanera Greenland Water Banksip naatsorsuutaasa uppernarsarpaat. Ukiut tamarluinnangajaasa ingerlatseqatigiiffik amigartooruteqarluni ingerlasimavoq. 

Maannali neriuutissaqalerpoq, Greenland Development Partnersillu partnerillu Josette Sheeranip Greenland Water Bankimi siulersuisuni siulittaasunngorlunilu ikinnerussuteqarluni aningaasaaliisunngorneratigut imermik nioqquteqartumut mikisumut immaqa periarfissat nutaat pilersinneqarsinnaalerput.

Puiaasaaqqami qillertuusamilu imeq Naak Greenland Water Bank ajornartorsiorsimagaluartoq, taamaattoq ingerlatseqatigiiffik allanit tamanit Kalaallit Nunaannit imermik nilammillu niueruteqarniarsimasunit ingerlalluarneruvoq. Ingerlatseqatigiiffiit amerlanerit tunisassiaqarsimanngillalluunniit. 

Greenland Water Bankilli tamanna iluatsissimavaa. 

Taamaalillunilumi 2016-milli Brugsenimi, Pilersuisumi Pisiffimmilu kiisalu neriniartarfinni assigiinngitsuni Imivik pisiassaasimavoq. Aallaqqaammut puiaasat liiterip affaanik angissusillit nioqqutaapput, Nuuk Imerulli matunerata kingorna kiisalu 2024-mi utertitsisarnermik aaqqissuussinerup allanngortinneqarneratigut, Greenland Water Bank Imivimmik qillersuusamiittumik misiliivoq. 

Atugassarititat ajornakusoortut Piffissap ingerlanerani ingerlatseqatigiiffiup Kondivik, Kuulavik kiisalu Imivik brusilik nioqqutissatut saqqummiussimavai - iluatsitsiviulluanngitsumilli. – Nuuk Imerup matunera uatsinnut piffissami pitsaanerpaanngitsumi pivoq suleqatigiinnermi pitsaasoq pilersissimavarput, Imivimmilu puiaasaaqqami PET-imiittumi pitsaasorujussuarmik Kalaallillu Nunaanni maqinneqartumik tunisassiaqarsimavugut. Matuneranili siunissami tunisassiornissamut allannguinissaq aalluttariaqalerlugulu, peqatigisaanik Qeqertarsuarmi Uunartuarsummi erngup atorneqanngitsup kisermaanniarnera qulakkeerniartariaqalersimavarput, taamaalilluta suliniutip ineriartortinnissaanut aningaasaleerusuttunik nassaarsinnaaqqulluta. Tamakkulu tamarmik inissimmata suleqatissaasinnaasut aningaasaliisuusinnaasullu ataatsimeeqatigiortorneri aallartippavut, Jørgen Wæver Johansen imalu nangilluni:

– Imermi tunisassiaavoq nalinginnaalluinnartoq, niuerfimmilu nioqqutit taamaattut amerlasoorujussuupput. Taamaalillutalu suleqatissamik eqqortumik imermik Uunartuarsummit nunarsuarmut anngutsitsisinnaasumik nassaarnissaq suliassarilerparput.

Amerikamiumut aningaasaliisartumut atassuteqarneq 

Greenland Water Bank Washingtonimi sinniisoqarfik aqqutigalugu Josette Sheeranimik, ukiuni arfineq marlunni FN-p Verdensfødevareprogrammianik (UN World Food Programme) siuttuusimasumik, Vestergaard Internationalimilu – ingerlatseqatigiiffik ilaatigut milluartaammik imermik saliissutitut atuuttumik, inuunernillu milliuunilikkaanik annaassisinnaasumi - siulersuisuni aamma ilaasortaasumik attaveqarpugut. Josette Sheeran Kalaallit Nunaanni imermik suliniummik ingerlasumik nassaarniarnermi soqutiginnippasippoq, tassanilu Greenland Water Bank ingerlatseqatigiiffinni tunisassiornermik ingerlatsisuni kisartaavoq. 

– 2023-mili Josette Sheeranimik imaannaanngitsumik CV-qarlunilu niuerfinnut nutaanut anngunnissatsinnik ikiusinnaalluni atassuteqartumik oqaloqatigiinneq aallartipparput. Taanna peqatigalugu maanna nunatsinni nioqqutissiassanik Qeqertarsuarmi maqitsivissamut, taamatullu aamma nuimanerusumik nunarsuarmi niuerfinni nioqqutissatut eqqarsaatigisamik tunisassiornissamik eqqortumik aaqqiissusiornissamik suliaqaleruttorpugut, Jørgen Wæver Johansen oqaluttuarpoq, taassumalu ingerlatseqatigiiffiup Amerikamiunik aningaasaliisoqarnerata danskit tusagassiorfiini sammineqarnera, taassumalu Trumpip naalakkersuisuinut niuertumullu Ronad Lauderimut, Trumpip Kalaallit Nunaannik pisinissamik isumassarsineranut tunuliaqutaanerakkamik atassuteqarunarneranik isumaliortitsilernera maluginiarpaa.

Isornartorsiuineq annertunerusumik tigunngikkaa

– Arlaata suunngitsoq sorsualiariniarsarigaa isumaqarpunga. Imermik nioqqutissiortuaraavugut, kiisami suleqatissamik nassaartut. Danskit suliffeqarfippassui arlallit aamma Amerikamiunik piginnittoqarnerat eqqaamaneqartariaqarpoq.

Kingullermik sapaatip akunnerani uani Københavnip Kommuniata Real Daniallu Royal Arena 1,4 milliardit koruunilerlugu Amerikamiut ingerlatseqatigiiffiannut Live Nationimut tunivaat, taamatullu aamma Aarhusip mittarfia, attaveqaatitut pingaarutilittut taaneqartoq qanittumilu Amerikamiut ingerlatseqatigiiffiannit Fairchildimit pisiarineqartoq? Taamaakkaluartorli kalaallit suliffeqarfeerannguat Amerikamiunit kiisami aningaasaliivigineqarami sammineqartorujussuanngorpoq. Tamanna tupigusuutiginngitsoorsinnaanngilara, Jørgen Wæver Johansen oqarpoq.

Naalakkersuisoq nuliarigaa 

Niuertuuginnarnani imermillu tunisassiorfimmi pisortaaneranut tunngatiinnarnagu, aammali nunanut allanut naalakkersuisumut Vivian Motzfeldimut uiunini pillugu apeqqummut Jørgen Wæver Johansen ima akivoq:

– Nuliara maanna Naalakkersuisut allat assigalugit malitassiat ersarissut atorlugit atuuppoq, suliassanillu uannut suliannullu attuumassuteqartunik saqqummertoqassappat, soorunami attuumassuteqarnini oqaatigissavaa. Qujanartumillu politikerimik nuliaqaraanni suliaqaqqusaanerit atuutinngillat. Nunamimi tamat oqartussaaneranni pissutsinik imaattunik sillimmartaartunik inatsiseqartumi inuuvugut. Tamatumalu saniatigut nuliara aalajangiisinnaanermut piginnaaneqarluarpoq, taakkulu uannut saqqummiunneqarneq ajorput.

– Sulialli iternga uterfigissagutsigu, illoqarfimmi Qeqertarsuartut ittumi inuussutissarsiornikkut ineriartornermik suliffissaqartitsinermillu pilersitsinissaq siunertaavoq. Tamatumunngalu Josette Sheeranip attaviisa peqataaqataanissaat neriuutigaarput. Ukioq manna arlaleriarluni Qeqertarsuarmiippoq, tassanilu najugaqartunit tikulluaqquneqartuaannarpoq, Jørgen Wæver Johansen oqarpoq.