Finansforbund Sulisitsisullu ulluni arlalinni isumaqatigiinniareerlutik aningaasarsiat pillugit isumaqatigiissut nutaaq februaarip 23-ani atsiorpaat.
- Sulisunut pitsaasumik ukiuni tulliuttuni pingasuni isumaqatigiissuteqarpugut. Kalaallit Nunaanni pissutsit immikkut innerat eqqarsaatigalugit isumaqatigiinniarnerit ilungersunaraluarput, kisianni naleqquttumik angusaqarpugut neriullutalu ilaasortat tamanna tarrarsorfigisinnaassagaat, Finansforbundetimi isumaqatiginninniarnermi pisortaq Marianne Kjær tusagassiuutitigut nalunaarummi oqarpoq.
Eqqissinermik pilersitsivoq
Aningaasanik ingerlatseqatigiiffinnut eqqissisimanartumik isumaqatigiissuteqartoqarnissaa pingaaruteqartoq, Sulisitsisuni pisortaq Christian Keldsen oqarpoq.
- Illuatungeriit naammagisimaagaannik isumaqatigiissuteqarnerput nuannaarutigaara. Kalaallit Nunaanni inuussutissarsiortunut inuiaqatigiinnullu pingaaruteqarpoq, Christian Keldsen tusagassiuutitigut nalunaarummi oqarpoq.
Isumaqatigiissut sapaatip-akunnerini tulliuttuni ilaasortanit taasissutigineqartussanngorpoq.
