Camp Itivi amerlanerusunik tikeraartoqartoq

Nuup Kangerluani Camp Itivi nunatsinnit avataaniillu takornarianit Kalaallit Nunaanni asimi innarlerneqanngitsumiinnissaq nuannarineqarluarpoq.

Inissisimaffia eqqissisimanartumiippoq taamaallaat uumasut eqqaamioralugit interneteqaranilu oqarasuaateqarani.

Nunatsinni suliffeqarfiit maanna tammaarsimaarfik ataatsimiinnernut sulisuminnullu qasuersaarusuttunut tammaarsimaarfittut atortarpaat.

Suliffeqarfiuvoq ataasiinnarmit pigineqartoq Nikolaj Jensenimit ingerlanneqartoq.

Piffissami ingerlanneqarfiani poorski sioqqullugumiit oktobarimut sapaatit akunnerisa naanerini suut tamaasa isumagisarpai. Ulloq matuffissaa suunersoq kangerluup sikunera apeqqutaasarpoq.

Nutaamik mittarfittaarnikkut avataaniit takornariat amerlanerulersimapput, ilaatigut Asiamiiit tikeraat 20.

– Nunatsinni suliffeqarfinnit avataaniillu takornarianit unnersiorfigineqartarpunga, maannalu aappaagumut angalasussani Tuluit Nunaannit Schweizimiillu paasiniaasoqartarpoq.

Tammaarsimaarfimmiipput illuaqqat tallimat. Illuaqqat pingasut attartortittagaapput, sungaartoq, tungujortoq qorsullu, quassuttuut 92 millimeterit atorlugit sanaajusut. Sulisunut illumiippoq tikeraanut uffarfik nammineq isertarfeqartoq kiisalu qui 72 kvadratmeteri. Kiisalu illuaraq ataatsimoorfik igaffeqarlunilu isersimaartarfeqartoq.

Illuaqqat tamarmik seqinermut tigooraaveqarput sarfamullu toqqorsiveqarlutik. Sulisunut illuaraq angisooq siunissami 6,2 kw-imut seqinermut tigooraaveqassaaq sarfamullu toqqorsiveqarluni.

Illuaqqat amerlinissaannik pilersaaruteqarpoq tikeraanullu neriniartarfimmik.

Aporfissarpassuit

Nikolaj Jensen elektromekanikeritut elinstallatøritullu ilinniarsimasoq. 2019-20-mi tammaarsimaarfik takornarianut suliffeqarfittut aallartippaa.

Aallartiffissamut piffissami ajornerpaami.

Aallaqqaammut ajornartorsiuterpassuit aporfissallu misillerfigai.

Ukioq siulleq corona peqqutigalugu suut tamarmik uninngapput, kingornalu Ukrainemi sorsuttoqalerluni, taamaalillutik sanaartornermut atortussat tamarmik akitsorujussuarlutik.

Aporfissalli anigorpai.

Kingorna ukiut tamaasa sinneqartoortalerpoq iluarsaassinermut annertusiinissamut toorneqartunik suliffeqarfik siunissamut qulakkeerniarlugu. Ilaatigut seqinermut tigooraaveqalerluni sarfamut toqqorsivittalimmik.

Suut tamaasa kisimi isumagai. Tikeraat siumut utimullu gummibådimik angallallugit. Pisiniarluni, errorsilluni eqqiaallunilu, tammaarsimaarfimmi kiffaartuussilluni angalaartitsillunilu.

Ikinngutigilluakkaminiilli Otto Frank Hansenimit ikiorteqarpoq assartuinermi kiffartuussinermilu Stefan Josefsenimillu sanasuullunilu sarfalerisuusumit. Ulapaarfiup nalaani ikiortissamik pisariaqartitsigaangat tamatigut ikiuuttarput. Tamanna Nikolajip qujaruteqaa.

Tikeraat kinisimaarlutillu saunartarput, angalatitsisoqarlutik kisimiillutilluunniit angalaarlutik uumasut alutorsaatigalugit, kangerlummi kuumiluunniit aalisarlutik. Periarfissaqarportaaq Nuup Kangerluani angeqisumi angallammik angalaarnissamik pisinissamut, Sermeq, Qoornoq, qooqqut, Kapisillit, Neriunaq, Itivnera Uummannarlu takuniarlugit aqqutaanilu arfersiorlutik. Nuannisarfissarpassuaqarpoq.

 

Angallammik anginerusumik amigaateqartoq

Angallammik anginerusumik amigaateqarpoq.

– TIkeraat ataatsikkut ilummukarlutillu silammukartussaatillugit angallammik anginerusumik attartortariaqartarpunga. Tamanna akisuvoq piumaneqaqaammi. Umiarsuarmillu takornariat takkukkaangata angallatip akia qaffarujussuartarpoq, oqaluttuarpoq.

Taaneqareersutut sinneqartoorutit tammaarsimaarfimmut aningaasaliissutigisarpai.

Taamaakkaluartoq ileqqaarsimavoq aningaasallu angallammik inunnik qulinik ilaasoqarsinnaasumik marlunnillu inuttalimmik akiliinissap affaanut akiliutigisinnaasimagai, aningaaserivilli peqataajumanngilaq naak ussassaarutigiuaraluarlugu aallarnisaasut ikiortarlugit.

– Nunatsinnili suliffeqarfinnguamut inummit ataatsimit ingerlanneqartumut atuussimagunanngilaq, oqarpoq nangillunilu:

– Tikeraat siumut utimullu ingerlannissaannut angallammik anginerusumik peqartuuguma tamanna suliffeqarfinnut annertuumik iluaqutaassagaluarpoq, aammalu kangerlummi angalaarnerni aallaaniartoqasinnaagaluarpoq Camp Itivimi pisariaqartinneqartinnagu. Paasisinnaanngilara aningaaseriviup sooq tamanna takusinnaannginneraa, oqarpoq.

Nuummi takornarianut angallatit namminersortunit pigineqartut amerliartorput, illoqarfiit pingaarnersaanni takornariaqarfiunerujartortumiittut, sinneqartoortartullu. Nikolaj Jensenip paasiuminaatsippaa suliffeqarfimmilu sullitaqartumut sinneqartoortartumullu angallammik pisinissamut aningaasalerneqarsinnaannginnini.

Ajornartorsiuterpassuit aporfissallu peqqutigalugit maannakkorpiaq isumaliutigaa suliffeqarfik taamaatiinnassanerlugu Nuuk Water Taximut aningaasaliisartumulluunniit allamut akigalugu.

– Taarsiullugu aningaasat Nuummi sarfalerisutut niuertarfinnik namminerisannik aallartitsisinnaanerlunga ilinniagaralu atorlugu, oqarpoq.