Imeqarfimmut killeqarfik inuussutissarsiornermut eqquinerluttoq

Ukiuunerani assartuutit motorinik ingerlatillit nunaannarmi atorneqarneri pillugit Avannaata Kommuniani ileqqoreqqusaq naapertorlugu, Ilulissani imeqarfimmut killeqarfik motorilinnik ingerlaffigeqqusaanngilaq. 

Ilulissat Kangerluanut ingerlaassagaanni Akinnaap tungaanut aqqut imeqarfimmut killiliussap iluaniimmat, taanna qimussimik taamaallaat aqqutigineqarsinnaavoq. 

Taamaattumik motorinik ingerlatillit atorlugit Ilulissat Kangerluanut ingerlassagaanni, imeqarfimmut killeqarfiup avataatigut aqqut akuerisaq atorlugu taamaallaat ingerlasoqarsinnaavoq. 

Ukiorli manna apuutasannera pissutaalluni, aqqut taanna maannakkut ingerlaviffigineqarsinnaanngilaq. Tamannalu inuussutissarsiornermut annertuumik eqquinerluttoq, takornarialerisut aalisakkanillu suliffissuit oqaatigaat.

Takornariaqarneq eqqugaasoq

Ukiuni kingullerni Ilulissat Kangerluani takornariaqarneq annertuumik inerisaaffigineqarpoq. Unnuisarfiit sanaartorneqarput motorinillu angallatillit atorlugit angallassisarneq annertusiartortumik ingerlanneqarluni.

Ukiorli manna Ilulissani aputaasammat motorinik ingerlatillit atorlugit Ilulissat Kangerluanut aqqut akuerisaasoq atorneqarsinnaanngilaq. 

Tamannalu takornarialerisunut annertuumik eqquinerluttoq, Ilulissat Excursions ApS-imi pisortaq aamma Ilulissat Local Guide ApS-imi piginneqataasoq Jan Cortsen oqarpoq. Taanna nutaaliaasunik UTV-nik pingasunik ilaasoqarsinnaasunik pitaaqqammerpoq, taakkulu piffissami matumani Ilulissat Kangerluanut angallassissutissatut atorneqarnissaat siunertaagaluarpoq.

- Maannakkut Ilulissat Kangerluanut Akinnaaq kisimi aqqutaavoq, taannali motorinik ingerlatillit atorlugit aqqutigineqarnissaa inerteqqutaammat aningaasarsiornissarput annertuumik eqqugaavoq.

- Takornarissanik ukiuunerani Ilulissat Kangerluanut angallassisinnaanngikkuma, tamanna 400.000-600.000 koruunit missaannik annaasaqaataanissaa naatsorsuutigaara, taanna oqarpoq.

Ilulissat Kangerlua UNESCO-p nunarsuarmi kingornutatut eriagisassatut 2004–mi ilannguppaa, tamannalu ilaatigut peqqutaanni ukiut tamaasa takornariarpassuarnit ornigarneqartarpoq.

Tunisassiorfiit aamma eqqugaasut

Ilulissat Kangerluani sikukkut ningittagarsiorluni qaleralinniarnermi pisat, qamuteralaat atorlugit Royal Greenlandip Halibut Greenlandillu aalisakkanut suliffissuaataannut assartorneqartarput. Ukiorli manna assartuineq ajornakusoortoq Halibut Greenlandip pisortaa Erik Sivertsen oqarpoq.

- Qalerallit Ilulissat Kangerluani pisat tunisassiornermut annertuumik pingaaruteqarput. Motorillillu atorlugit assartuinissamut immikkut akuersissuteqartoqanngippat tunisassiat ikileriarnerannik kinguneqassaaq.

- Ukiut siuliini motorillit atorlugit ingerlaffigeqqusaanngitsukkut assartuineq ingerlattarnikuuarput, pisortalli pisussaaffitsik malillugu akiligassinnikuuaatigut. Taamaattumik aqqutit taakku maanna atornaveersaartarpagut.

- Illoqarfipput killeqarfinnik ungaloqqavoq, tamannalu inuussutissarsiornermut annertuumik eqquinerluppoq, pisortaq oqarpoq.

Ukiut siuliini qalerallit 200 tonsit missaanniittut Ilulissat Kangerluaniit Halibut Greenlandip aalisakkanik suliffissuaataanut assartorneqartartut, pisortaq erseqqissaavoq.

Aqqutissaq suliarineqartoq

Motorinik ingerlatillit Ilulissat Kangerluanut aqqutaat akuerisaq Koororsuaq, illiniliuutit atorlugit qanittumi apusersorlugu suliarineqassasoq, Ilulissani namminersortoq illiniliuutinik ingerlatsisoq Bernhardt Olsen oqarpoq.

- Apummik assartuilluta Koororsuaq apusersussavarput, neriuppungalu sapaatip akunnera ullulluunniit qulit missaat qaangiuppata aqqutigineqarsinnaalissasoq, taanna oqarpoq.

Motoorinik ingerlatilinnut aqqutit apusersorlugillu suliarineqarnerannut illoqarfimmi takornarialerisut arlallit ikiuunniarlutik nalunaarsimasut Bernhardt Olsen oqarpoq.

Suliaq ingerlasoq

Avannaata Kommuniani borgmesterip Lars Erik Gabrielsenip, Siumut, oqarnera naapertorlugu, Ilulissani imeqarfimmut killeqarfiup inuussutissarsiornermut annertuumik killiliisarnera unitsinniarlugu, Avannaata Kommunia ukiuni arlalinni suliaqarsimavoq. Tamannali maannamut suli angusaqarfiusimanngilaq.

- Innuttaasut isumaqartarput qamuteralannik ingerlaqqusinnginneq kommunip aalajangersagarigaa. Taamaanngilaq, taanna Inatsisartuniippoq Naalakkersuisuniillunilu.

- Massakkumut ajornartorsiutaasut Naalakkersuisumut susassaqartumut anngunneqarput, Akinnaakkut qamuteralannik ingerlaarsinnaaneq immikkut akuerineqassasoq qinnutigineqarluni. Kisianni suli iliuuseqartoqanngilaq.

- Naalakkersuisut siulittaasuat Jens-Frederik Nielsen ukioq kingulleq decemberimi Ilulissanut tikeraammat, ajornartorsiutip iliuuseqarfiginissaa oqariartuutigineqarpoq, kisianni aamma suli iliuseqartoqanngilaq, borgmesteri oqarpoq.

Ilulissat Kangerluanut aqqutit qamuteralannik atorneqarsinnaasut, tassa Koororsuaq aamma Tununngasoq, Bernhardt Olsenimut suliakkiutigineqareersut piaarnerpaamillu aaqqinneqarumaartut, borgmester Lars Erik Gabrielsen erseqqissaavoq.