Inuussutissarsiortut oqilisaanneqassasut

Nunami aalisakkanut suliffissuarnut kallerup inneranut imermullu tapiissuteqartarneq Nukissiorfiit isertitaat allat aqqutigalugit aningaasalersugaavoq, taamatullu akikilliisarneq Nukissiorfiit isertitassaraluinik 2024-mi 43,3 millionit koruuninik annaasaqataavoq. Tassunga assingusumik aallarnisaasunut suliffeqarfinnullu mikinerusunut tapiissuteqartarneq atuutilersinneqassappat, aningaasalersueriaatsimik allamik atuisoqartariaqassaaq.

Inatsisartunut ilaasortap Napaartoq Petrussenip, Demokraatit, paragraf 37 naapertorlugu apeqqutaanut inuussutissarsiornermut, aatsitassanut, nukissiuutinut, inatsisit atuutsinneqarnerannut naligiissitaanermullu naalakkersuisoq Naaja H. Nathanielsen, Inuit Ataqatigiit, akissuteqarluni ilaatigut allappoq.

Periarfissat allat misissorneqassasut

Suliffeqarfissuit angisuut, soorlu Royal Greenland, nunami aalisakkanut suliffissuaatillit kallerup inneranut imermullu aningaasartuutinut tapiiffigineqartarput. Akerlianilli suliffeqarfiit namminersortut mikisut tapiiffigineqarneq ajorlutik, tamannalu aningaasatigut annertuumik artukkiisartoq Napaartoq Petrussen oqarpoq. Taamaattumik aallarnisaasut suliffeqarfinnut mikisunut nunap qaani tunisassiornermik ingerlataqartunut atugassarititaasut pitsaanerulersinniarlugit, taakkununnga kallerup inneranut imermullu tapiiffigineqartarneq atuutilersinneqartariaqartoq taanna isumaqarpoq.

Namminersortunut siuarsaanermut ineriartornermullu iluaqutaasut, tassunga ilanngullugit aallarnisaasut suliffeqarfiillu mikinerusut, Naalakkersuisunit tunngaviatigut tapersersorneqartt, Naaja H. Nathanielsenip oqarpoq.

- Akikillisaaffigineqartarnermik aaqqissuussineq maanna aalisakkanik suliffissuarnut nunamiittunut atuuttoq ullumikkut Nukissiorfiit isertitaat allat aqqutigalugit aningaasalersugaasoq maluginiassallugu pingaartuuvoq.

- 2024-mi akikillisaatit nalingat 43,3 millionit koruuniupput, takkuuppullu Nukissiorfiit isertitaannit annaasat. Tamanna ima paasisariaqarpoq, aningaasartuutit naggataagut atuisunit allanit tamanit akilerneqartarmat ilutigisaanillu Nukissiorfiit aningaasaqarnerannik nanertuilluni, Naaja H. Nathanielsen oqarpoq.

Taamaattumik nutaamik aaqqissuussisoqassappat Nukissiorfiit aningaasaqarnerannut ajorseriartitsinngitsumik imaluunniit akigititanut atuisunut allanut sunniuteqanngitsumik, aallarnisaasunut suliffeqarfinnullu mikinerusunut atuuttussamik aningaasalersueriaatsimik allamik atuisoqartariaqartoq, naalakkersuisoq erseqqissaavoq.

Suliniutit nutaat

Naalakkersuisut siuarsaanissamut inuussutissarsiornermullu periusissiaq maanna suliaraat, tassanilu suliniutit nutaat arlallit aallarnisaasunut iluaqutaasussat naliliiffigineqassapput. Iluarsartuussinissamut, allaffissornikkut oqilisaaffigineqarnissamut niuernermullu tunngasutigut iliuusissanut periarfissat aamma ilanngunneqarput.

Imminut pilersornermut periusissiap 2025-2030-mut atuuttussap suliarineqarneranut atatillugu inuussutissanik nioqqutissiornerup imminullu pilersornerup iluani suliffeqarfiit aallartisartut eqqarsaatigalugit siunnerfigalugillu aaqqissuussiffiginissaat misissuiffigineqartoq, Aalisarnermut, piniarnermut, nunalerinermut imminullu pilersornermut Naalakkersuisoqarfimmiit paasissutissiissutigineqarpoq.

- Piffissami 2026-2029-mut atuuttussamik inuussutissarsiornermi siuarsaanermut atorneqartussat 2026-mi aningaasanut inatsimmi ukiumut 1 millionit koruunit immikkoortinneqarput, taakku imminut pilersornissamut siunertamut ilaapput. Aningaasaliissutit taakku periusissanik, Nukissiorfiit avataani atorneqarsinnaasunik, taamalu eqaatsumik aningaasartuutitigullu ersittumik aaqqissuussiffiusinnaasunik tunngaviliisinnaapput.

- Pingaartuuvoq, aalisakkanik suliffissuarni, tassunga ilanngullugit sinerissap qanittuani aalisartut amerlasuut aamma nunami tunisassiorfiit aalajaatsunik siumullu takuneqarsinnaareersunik atugassarititaasutigut sinaakkutissaqartitaammata. Aalisakkanut suliffissuit nunap aningasaqarneranut suli nammattuusussaapput taamaattumillu aalaakkaasumik ingerlanissaat pingaaruteqarluni, Naaja H. Nathanielsen akissuteqarluni oqarpoq.

Ineriartorneq nukittorsarneqassasoq

Inuussutissarsiutini nutaani, soorlu imminut pilersornerup iluani, ineriartornerup pitsanngorsarneqarnissaa politikkikkut anguniagaasoq Naaja H. Nathanielsen erseqqissaavoq.

- Inuussutissarsiutit arlallit kattullutik ineriartorsinnaapput. Naalakkersuisunit inuussutissarsiutit allat inerisaaniassammata ilaasa illuartinneqarnissaat takujuminaatsinneqarpoq. Siuarsaanissaq inuussutissarsiornerlu pillugit periusissiassami suliniutit nutaat aallartisaanermik ikorfartuisuunissaat ilaatigut anguniartussaavarput. Tassunga ilanngullugit iluarsartuussineq, allaffissornikkut oqilisaassineq aamma niuernermut tunngasutigut suliniuteqarnissaq, oqarpoq.

Inuussutissarsiornermik ingerlatsisunut nutaanillu inuussutissarsiutinik aallarnisaasunut atugassarititaasunut sinaakkutissanik ataavartumik nukittorsaanissaq ilisimasanillu katersineq Naalakkersuisut suliarigaat, Naaja H. Nathanielsen paragraf 37 naapertorlugu apeqqummut akissuteqarluni naggasiivoq.

Isumalluarnartoq

Suliffeqarfinnik ineriartortitsinermik suleriusissaq qanoq ineriartortinneqassanersoq paasissallugu pingaaruteqartoq, Napaartoq Petrussen isumaqarpoq.

- Suliffeqarfiit angisuut aalisarnermik inuussutissarsiortut ullumikkut affaannarmik kallerup inneranut imermullu tapiiffigineqartarput, kisiannili aallarnisaasut suliffeqarfeeqqallu taamatut periarfissaqanngillat, tamannalu allanngortinneqartariaqarpoq.

- Suliffeqarfiit amerlanerusut piujuartitsinermi, pinngortitamik mianerinnittumik imminullu akilersinnaasumik ingerlassappata pitsaasumik atugassaqartinneqartariaqarput.

- Taamaattumik suliffeqarfiit nutaaliortut suliffissanillu pilersitserusuttut kallerup inneranut imermullu aningaasartuutaasa affaat utaqqiisaasumik piffissami aalajangersimasumi affaannanngortinneqarnissaat pisariaqarpoq, oqarpoq.

Pineqartoq pillugu Naalakkersuisuniit sulissutigineqartussatut akissutigineqartut siunissamut isumalluarnerulersitsisoq, Napaartoq Petrussen isumaqarpoq.