Inuusuttut 2024-mi saqqummiussisut arlallit ataatsimeersuarnermi inersuarmit nikuilluni ersaartaanneqarput. Tassa Sulisitsisut aaqqissuussaminni - ”Future Greenland”-imi inuusuttunut ”Future of Greenland”-imik taallugu sammitinneqartumi 2009-mi ingerlassimasaminnik, Sulisitsisut aaqqissuussimmata.
Inuiaat naalakkersueqataanerat pillugu oqaloqatigiinneq
Inuusuttut 450-it 2024-mi ataatsimeersuarnermut peqataapput, ukioq mannalu taama amerlatigisut peqataanissaat anguniarneqarluni, ataatsimeersuarneq Nuummi Katuami maajip arfernanni pissaaq.
Meeqqat atuarfianni atuartut angajulliit kiisalu GUX-imi, KTI-mi, niuernermik ilinniarfinni allanilu inuusuttunut ilinniarfinni ilinniartut saaffigineqarput.
Inuusuttut kisimik qaaqquneqanngillat. Partiinimi siuttut tamarmik tusarnaariarlutik inuusuttunillu oqaloqateqarniarlutik aamma takkunniarput. Naalakkersuisut siulittaasuat Jens-Frederik Nielsen ullormut saqqummiussisussani kingulliulluni saqqummiussissaaq, tassanilu ullup ingerlanerani oqariartuutigineqartunut oqaaseqarnissaminut periarfissaqassalluni. Piaaraluni ataatsimeersuarneq ammarnianngilaa imaluunniit sammisassaannik aalajangersaanianngilaq – tassami inuusuttut oqaloqatigiinnissaminnut periarfissinneqartariaqarmata tusarnaaqqissaarneqartariaqarlutillu. Inissaqartinneqartariaqarput tusarnaarluarneqartariaqarlutillu. Aamma nuna tamakkerlugu siulittaasuugaluaraanniluunniit.
– Inuiaat naalakkersueqataanerat aamma sooq tamanna pingaaruteqarnersoq oqaluuserissavarput. Ilaatigut Naalagaaffiup sinniisoqarfiani inatsisilerinermut pisortaq Morten Nornild qaaqquaarput. Aamma piujuartitsineq oqaluuserissavarput qulequtaq una aallaavigalugu ”inuussutissarsiortut akisussaaffimmik tigusigaangata". Aammattaaq kalaallit inuusuttut nunani avannarlerni periarfissaat Nordjobbimi suliniummik aqutsisup Sara Jacobsenip saqqummiussai tunngavigalugit sammissavavut, Sulisitsisuni pisortaq Christian Keldsen oqaluttuarpoq.
Eqqumiitsuliornermit, kulturimit aamma timersornermit inuussutissarsiuteqarnermut
Nalik Ventures aamma Visit Greenland aallarnisaasarneq pillugu oqaluttuassapput, aamma Angunnguaq Larsenip Nina Skydsbjergillu oqalugiarnerminni “Crazy Greenland – eqqumiitsuliorneq kulturilu inuussutissarsiutinngoraangata” sammissavaat.
Tamatuma saniatigut timersorneq inuussutissarsiutigalugu suliffeqalernissamut periarfissatut sammineqarpoq, tamannalu Elite Sport Greenlandimi allattoqarfimmi pisortap Muusaarannguaq Ostermann-Søholmip Polar Seafoodimilu piginneqataasup Laila Friis-Sallingip oqaluttuarissavaat.
Laila Friis-Salling 2018-imi ukiuunerani OL-ertoqarnerani freestyle halfpipe-mi sisorarnermi peqataavoq.
Uumassusilerineq aamma imminut illersornissaq
– Naggataatigut uumassusilerinermi kalaallit naleqartitaat oqaluuserissavavut SILA-mi immikkoortortami pisortap Aviâja Lyberth Hauptmannip ilinniartullu ilaasa saqqummiussinerat aallaavigalugit. Taava Issittumi Siunnersuisoqatigiit Youth Council-iminnik saqqummiissapput, naatsorsuutigaarpullu Illersornissaqarfiup nunarsuarmi pissutsit Kangerlussuarmilu Issittumi tunngaviusumik ilinniarneq eqqartorumaarai, Christian Keldsen oqarpoq nangillunilu:
– 2026-mi ataatsimeersuarnermi 2024-mi misigisatsitut nukittunerulersitsisinnaagutta angusaqarluarsimassaagut. Inuusuttut alapernaannerat pissanganartorujussuuvoq. Inuusuttut nuannaarlutik ulloq nuannersoq qaangiukkaangat Katuamit anisarumaartut neriuppugut. Anigaangamik siunissaq qiviarlugu ingerlasarput neriuutigalugulu qanoq kinguneqarsinnaanera qanorlu nammineq sunniuteqarfigisinnaanerlugu isumassarsisimallutik.
Allaaserisaq una Sulisitsiunit tapiiffigineqarpoq.
