Inuussutissarsiutigalugu aalisartut Kalaallit Nunaanni allami najugaqalersimasut imaluunniit Danmarkimut nuussimasut aalisarsinnaanermut piniarsinnaanermullu allagartaminnik pissarseqqinnissaminnut periarfissaqarput.
Tamanna Aalisarnermut, Piniarnermut, Nunalerinermut Imminullu pilersornermut Naalakkersuisup Peter Borgip Demokraatineersup Inatsisartunut ilaasortamut Isak Johannesenimut Naleqqameersumut akissutaani atuarneqarsinnaavoq.
Taanna assersuutigalugu aapparisap ilinniarneranut atatillugu allami najugaqaleraanni inuussutissarsiornermut allagartaq annaaneqaratarsinnaanersoq paragraf 37 naapertorlugu apeqquteqarpoq
Allagartaq annaaneqassanngitsoq
Naalakkersuisoq naapertorlugu Aalisarnermut, Piniarnermut Nunalerinermullu Naalakkersuisoqarfik inuussutissarsiutigalugu aalisartut qassit allamut nooreerlutik aalisarsinnaanermut piniarsinnaanermullu akuersissutinik kiisalu piniarsinnaanermut allagartanik tunineqartarnersut pillugit kisitsisitigut paasissutissanik peqanngilaq. Aalisartut piniartullu Kalaallit Nunaanni allami nunalluunniit avataani najugaqalersartut ataavartuusut taassumattaaq ilisimatitsissutigaa.
- Aalisartut allamut nuukkaangamik aqutsiveqarfimmi aalisarfigisaminnit allamut aalisarsinnaanermut akuersissummik qinnutigisariaqarsinnaavaat. Tamannali aqutsiveqarfimmit allamut nuussappata aatsaat pissaaq. Akuersissutitik annaassanngilaat, kisianni aalisarsinnaanermut akuersissutit pisassiissutillu pillugit nalunaarummi paragraf 18 naapertorlugu aqutsiveqarfimmi nutaami qinnuteqassapput, Peter Borg allappoq nangillunilu:
- Piffissami aalajangersimasumi akuersissutinik qinnuteqarsimanngikkunik imaluunniit atorsimanngikkunikku, assersuutigalugu namminneq ilaquttaminnilluunniit ilinniartoqarnera sivisuumilluunniit napparsimasoqarnera pissutigalugu, akuersissutit pisassiissutillu pillugit nalunaarummi paragraf 16 naapertorlugu akuersissummik pissarsinissamut immikkut ittumik qinnuteqarsinnaapput.
Nunamulli allamut nuukknni inuussutissarsiutigalugu aalisartut Kalaallit Nunaanni aalisartuusinnaajunnaartarput, Inatsisartullu aalisarneq pillugu inatsisaanni paragraf 9 naapertorlugu ukiuni tallimani Kalaallit Nunaanni najugaqarsimatinnatik akileraartareersimatinnatillu akuersissummik pissarsisinnaajunnaartarput.
Aalisarnermut Piniarnermullu Naalakkersuisoq naapertorlugu aalisartoq ilinniagaqarneq, napparsimaneq assigisaanilluunniit pissuteqarluni Kalaallit Nunaata avataaniikkallarsimasoq aalisarneq pillugu Inatsisartut inatsisaanni piumasaqaatit aalajangersimasut naammassigunigit akuersissummik tunineqarsinnaavoq.
Pissarseqqinnissaq immikkullu ittumik akuerisaaneq
Sunngiffimmi inuussutissarsiutigalugulu piniarnermut allagartat pillugit nalunaarutit atuuttut naapertorlugit inuit sunngiffimmi inuussutissarsiutigalugulu piniarnermut allagartallit najugaqarfimminnit nuunnerminni Sullissivik aqqutigalugu, aamma kommunimut allamut, nalunaaruteqartariaqartut Naalakkersuisoq Isak Johannesenimut ilisimatitsivoq.
- Kommunimi nutaami piumasaqaatinik suli naammassinnikkaangamik sunngiffimmi inuussutissarsiutigaluguluunniit piniarsinnaanermut allagartaq tigummiinnassavaat, najugaqarfilli nutaaq allassimassaaq. Najugaqarfiup allanngorneranik nalunaarnermi piniarsinnaanermut allagartamut akiliisimanerminnut uppernarsaatip assilinera ilanngussinnaavaat.
- Inuit sunngiffimmi inuussutissarsiutigaluguluunniit piniarsinnaanermut allagartallit ilinniagaqarnertik napparsimanertilluunniit pissutigalugu Danmarkimut nuukkaangamik, Kalaallit Nunaannut uterunik ilinniarsimanerminnut uppernarsaatit imaluunniit nakorsamit nalunaarutit ilanngullugit piniarsinnaanermut allagartamik pissarsisinnaapput. Assersuutigaluguli piniutit suli pigineqarnissaannut piumasaqaat suli eqquutsinneqassaaq.
Naalakkersuisut aalisartut piniartullu ikilisarnianngikkaat, aammali aalisarneq piniarnerlu piujuartitsisoq kissaatigigaat, taamaammallu inuussutissarsiummut sinaakkutissat pitsaasut qulakkeerniarneqartut taassuma aamma erseqqissarpaa. 2016-imiit 2024-mut umiatsiaararsorluni aalisarnerup ineriartornera pillugu nalunaarusiaq naapertorlugu piffissami tassani umiatsiaararsortunik 147-nik amerlanerusunik ilannguttoqarsimasoq ilaatigut atuarneqarsinnaavoq.
Suliaq ingerlateqqikkaa
Upernavimmit Inatsisartunut ilaasortap Isak Johannesenip aalisartut allamut nuussimanertik pissutigalugu piffissami aalajangersimasumi aalisarsinnaasimanngitsut aalisarsinnaanermut allagartamik pissarseqqissinnaanissaannut tunngasut itisiliiffigineqarnissaat kissaatigaa.
- Maannamut aalisartut arlallit aalisarsinnaanermut piniarsinnaanermulluunniit allagartamik pissarsiniarnermi ajornartorsiuteqarsimasut paasivarput. Taamaammat aalisartup qanorluunniit ukioqaraluaruni illoqarfimmut allamut nuukkaangami, aappani pilersorniarlugu, aalisarnermik ingerlataqaqqilernissaa ajornannginnerulissaaq. Taamaammat piffissami aggersumi aalisarnermit paasissutissanik amerlanerusunik katersinissara pilersaarutigaara, taamaalillungalu piffissami aggersumi paragraf 37 naapertorlugu apeqquteqaat nutaaq suliarissavara, Isak Johannesen oqarpoq.
Naleraq Inatsisartuni partiit aalisarnermut inatsisip maannakkutut isikkoqartup atuutilersinneqarnissaanut akerliusut ilagaat, taakkulu piffissami aalajangersimasumi kinguartinneqarnissaa piumasaraat.
Abonnementer
Sermitsiaq.gl – Nittartagaq
- Sermitsiaq.gl-imi allaaserisat tamakkiisumik atuarsinnaalissavatit
- Qaammammut kr. 59.00
- Ukiumut kr. 650.00
Sermitsiaq - E-aviisi
- Sermitsiaq e-aviisitut tallimanngornerit tamaasa saqqummersartoq atuarsinnaalissavat
- Sermitsiaq.gl-imi allaaserisat tamakkiisumik atuarsinnaanngussavatit
- Qaammammut kr. 191
- Ukiumut kr. 1.677
AG - Atuagagdliutit E-aviisi
- Aviisi AG - Atuagagdliutit e-aviisitut pingasunngornerit tamaasa saqqummersartoq atuarsinnaalissavat
- Sermitsiaq.gl-mi allaaserisat tamakkiisumik atuarsinnaanngussavatit
- Qaammammut kr. 191
- Ukiumut kr. 1.677
Sermitsiaq.AG+
- Aviisi AG - Atuagagdliutit e-aviisitut pingasunngornerit tamaasa saqqummersartoq atuarsinnaalissavat
- Sermitsiaq e-aviisitut tallimanngornerit tamaasa saqqummersartoq atuarsinnaalissavat
- Sermitsiaq.gl-imi allaaserisat tamakkiisumik iserfigisinnaalissavatit
- Arnanut e-magasinatut atuarsinnaalissavat
- Nutserisoq.gl atorsinnaanngussavat
- Soqutiginnikkuit abonnement@sermitsiaq.gl-imut allagaqarsinnaavutit
Asasarput atuartartoq, Sermitsiaq.gl-imut – Kalaallit Nunaanni nutaarsiassanik isornartorsiuisumillu tusagassiornermik saqqummiussiffimmut – tikilluarit. Kiffaanngissuseqarluni tusagassiornerup siuarsarneqarneranik suliniuteqartuarsinnaajumalluta, itisiliillutalu isornartorsiuilluta tusagassiortuarsinnaajumalluta, allaaserisat aalajangersimasut akeqalersippavut. Tamanna iluaqutigalugu allaaserisat pitsaassusaat qulakkeersinnaavarput, tusagassiortuttalu pikkorissut oqaluttuanik pingaarnerpaanik saqqummiussinissaannut tapersersorsinnaavavut. Allaaserisat akillit qaammammut taamaallaat 59 koruuninit akeqarput. Pisineq ajornanngitsuararsuuvoq – ataaniittoq toorlugu saqqummiussavut tamakkiisumik iserfigisalersinnaavatit. Paasinninnerit tapersersuinerillu qujamasuutigaavut. Pituttorsimanngitsumik isornartorsiuisumillu Kalaallit Nunaannut tusagassiortarnissamik suliniuteqartuarnissamut akiliutivit ikiorpaatigut.
