Naalakkersuisup Peter Borgip (D) avammut tunisaqarfiusut amerlisarnissaat siunertaralugu USA-mi Bostonimi Seafood Expo North America peqataaffigaa.
Naalakkersuisup Peter Borgip (D) avammut tunisaqarfiusut amerlisarnissaat siunertaralugu USA-mi Bostonimi Seafood Expo North America peqataaffigaa.
Nunarsuarmi aalisakkanik nioqqutinik saqqummersitsinerit annersaanni peqataanermut kalaallit avammut tunisassiaasa nukittuumik inissisimalernissaat siunertaavoq. Amerikap avannaani niuerfimmut attaveqarnerup nukittorsarneratigut kalaallit tunisassiaat niuerfinnut amerlanerusunut siammarterneqarnissaat anguniarneqarpoq.
Bostonimi peqataaneq siunertalik
Peter Borgip tikeraarnermini Royal Greenlandip saqqummersitsivia takuniarpaa, tassani ingerlatseqatigiiffik nunarsuarmi tamarmi qanoq sulinera aamma nunat tamat akornanni niuerfinnut tuniniaasinnaaneq aalisakkanik qalerualinnillu nunatsinneersunik tuniniaanissamut qanoq pisariaqartiginersoq, taamaalillunilu nunatsinni isertitaqalersitsisartut, suliffissaqalersitsisartut aningaasaqartitsilersartullu paasisaqarfigai.
Aningaasaqarnerup siunissamut qulakkeernissaa naalakkersuisup Peter Borgip pingaartippaa.
- Nunani tamalaani niuerfiit qanoq ingerlanersut, aamma kalaallit aalisakkanik tunisassiaasa nunarsuaq tamakkerlugu tuniniarneqarsinnaanissaannut taakkununnga pisiniarnissap pingaaruteqassusia qanimut misigisimallugit naleqangaarpoq. Nunani tamalaani tuniniaasarneq niuerfinnullu iserneq Kalaallit Nunaanni suliffissanik, isertitassanik aningaasaqarnikkullu ingerlatanik tapersersuinermut pingaaruteqarpoq.
- Taamaattumik tikeraarninni pingaarnertut siunertaraara Amerikap Avannaanut avammut niuernerup annertusarnissaa, ullumikkumut naleqqiullugu nunanut allanut niuerfiusunut amerlanerusunut nioqquteqarnerup siammarternissaanut, Peter Borg oqarpoq.
Politikkikkut tapersersuineq isumaginninnerlu
USA-mut avammut tunisaqarnerunissaq tapersersorniarlugu Peter Borgip Amerikami aalisarnermut oqartussaasut NOAA (National Oceanic and Atmospheric Administration) ataatsimeeqatigai. Nunani tamalaani sinaakkutit pisariaqartut anguniarlugit oqaloqatigiittoqarpoq, taamaaliornikkut kalaallit tunisassiaat eqqunneqarnissaat ajornaannerulissammat.
Aammattaaq tikeraarnermini Massachusettsimi guvernøri Maura Healey ataatsimeeqatigaa, tassanilu avatangiisit immallu pisuussutaanik piujuartitsinermi atuineq pillugit soqutigisat oqallisigineqarput.
Oqaloqatigiinnermi Royal Greenlandip Bostonimi tuniniaanermut allaffia Kalaallit Nunaata niuerfimmut isersinnaaneranik pitsanngorsaanissamut pingaaruteqarluinnartutut oqaatigineqarpoq.
Aammattaaq sumiiffimmi piumaneqartunik tunisassiornikkullu ingerlatsinermik paasisaqarnerujumalluni Boston Sword & Tuna pulaarpai.
Ataatsimiinnerni taakkunani Kalaallit Nunaata avammut niuernera iluatsissappat tunisassiaq kisimi aalajangiisuunngitsoq, aammali USA-mut diplomatikkut inatsisitigullu attaveqarneq isumagineqartuartariaqartuuneranik takutinneqarpoq
