Canadamiut sanaartornermik suliaqartut Penneconimeersut Qaqortumi Greenland Airportsip mittarfissaanik nutaamik pitsaasumik naammassinnillutik decembarip qiteqqunnerani aallarput.
Angutit 100-t missaanniittut, ilarpassui paarlagiillutik sulisartut, ukiut marluk affaalu atorlugit mittarfik 1500 meterisut takitigisoq, apriilip 16-iani pisortatigoortumik atoqqaarfissiortinneqartussaq, qaartiterlugulu tunngavilerpaat.
Biilinik assartuutinik nunaqavissunut tunisineq
Penneconip, Newfoundlandimi qullersaqarfillip, mittarfik qimaannarnagu aammali sanaartornermik ingerlatseqatigiiffiup Canadamut atortussat allat nassarlugit utinnginnermini, biilinik assartuutinik marlunnik nunaqavissut pisiarisinnaasaannik periarfissiivoq.
Taamaammat Ford F-150-it aamma Dodge Ram 1500-t maanna Qaqortumi angallanneqarput.
Penneconip mittarfiliornerup nalaani nunaqavissut, ilaatigut 60 North Greenland, atortussanik umiarsuarmut assartuummut attartorsimasaminnut ikiuisut qanimut suleqatigai.
– Umiarsuaq angisuujullunilu Qaqortumut tulassinnaanngilaq, taamaammat Arctic Unlimited suleqatigalugu angallaterput taassumalu angallataa angallatitta angeqqataa atorlugit atortussat tamaasa nunamut taakkununnga assartorpagut, 60 North Greenlandimi pisortaq Malik Vahl Rasmussen oqaluttuarpoq.
- Atortussat assigiinngitsut katillugit 270-it missaat assigiinngitsunik angissuseqartut ulluni 30-ni umiarsuarmut assartorpagut — biilit containerillu assallatserutit angisuut assartunnginnermi isaterneqarsimasut ilanngullugit.
Umiarsuaq atortussarpassualik
Umiarsuaq Malik Vahl Rasmussen naapertorlugu Canadamiit Qaqortumut marloriarluni tikippoq.
- Siullermik asfalti, ingerlatseqatigiiffiup maskiinaasa ilaat, aserorteriviit, asfaltiliorfiit, assallatserutit, dozerit, biilit sanaartornermilu atortorissaarutit assigisaallu umiarsuarmit Canadamut assartorneqarput, taannalu kingorna imaqarani uterpoq.
– Naggataatigut atortuisa assartorneqarneranni annerusumik ikiuuttarpugut. Tamatuma saniatigut piffissami tamatumani assartuinermik isumaginninnermillu suliaqartarpugut, ilaatigut sulisunik maskiinanillu attartortarput, Malik Vahl Rasmussen oqaluttuarpoq.
