- Polar Seafood isumaqatiginninniarnernik unitsitsivoq

Illuatungeriinni isumaqatiginninniarnerit unitsinneqaraangata amerlanertigut isumaqatigiinniartut isumaqatigiissutigineqartut assigiimmik nassuiarneq ajorpaat.

Aalisakkerivissuit Royal Greenlandip Polar Seafoodillu isumaqatigiinniarneri unitsinneqarmata ersarissumik taamaappoq.

Aasianni Polar Seafoodip tunisassiorfiata annaanneqarnissaanut aaqqiissutissamik nassaarniarnermi illuatungeriit suleqatigiilluarsimagaluartut, suliamili matumani aaqqiissutissiiniarneq iluatsissimanngitsoq Toke Binzerip maanna oqaatigaa.

- Isumaqatiginninniarnerit unitsinngilagut. Ataatsimeeqatigineqaqqikkusunngitsugut Polar Seafoodimiit paasitinneqarpugut, Royal Greenlandimi pisortaaneq Toke Binzer Sermitsiamut oqarpoq.

Kinalu isumaqatiginninniarnerit unitsinneqarnerannut pisuunerosq Sermitsiap Royal Greenlandip pisortaanera Toke Binzer aperaa.

- Polar Seafood oqaloqatigiunnaassalluta nalunaarmat Polar Seafoodimik isumaqatiginninniarnerput unitsinneqarpoq, taanna oqarpoq.

Polar Seafoodimik isumaqatiginninniarnerit ajalusoorsimasut Sermitsiap apriilip 17-ianni allaaserimmagu pisortaaneq tupigusuppoq.

Bent Sallingip, Polar Seafood Greenlandimi pisortaanerup, aalisakkeriviit taakku marluk Polar Seafoodip raajaleriffiata aalisakkeriviatalu matunissaanik annaassiniarlutik aaqqiissutissarsisimanatik taamanikkut uppernarsarpaa.

Isumaqatiginninniarnerit ajalusoorsimasut Bent Sallingip aamma uppernarsarpaa.

Binzer: - Neqeroorutitsialaavoq

Toke Binzer naapertorlugu pissutsit allaanerulluinnarput. Royal Greenlandimi raajanik pilersuinermi ikiuukkumalluni neqerooruteqaraluartoq Polar Seafood isumaqatigiinniaqqikkusukkunnaarpoq, taanna nassuiaavoq.

- Polar Seafood raajanik amerlanerusunik pisariaqartitsivoq, Naalakkersuisullu pisariaqartitsinerup tamatuma qanoq matussuserneqarsinnaaneranik misissuinissarput kissaatigaat. Raajat 4.000 tonsit Polar Seafoodip tunisassiorfimminni Aasianniittumi ukioq manna amigaatigissallugit oqaatigisaasa affaat tulaanniarlutigit neqerooruteqarpugut.

- Polar Seafoodilli raajat affai nammineq pissarsisariaqarai oqarpugut. Tamanna neqeroorutitsialaasoq isumaqarpunga.

- Aalisarnermik inuussutissarsiuteqartut tamatta aaqqiissutissamik uaguttaaq akuerisinnaasatsinnik nassaarniassagatta Royal Greenland aamma qaleralinniarnermut tunngatillugu piareersimagaluarpoq.

- Polar Seafoodilli tamanna aamma itigartippaa. Ataatsimeeqqinnissat kissaatiginagit Aasianni suliffissuaq pillugu suliap politikkikkut aaqqinneqarnissaa kissaatigaat, Toke Binzer oqarpoq.

Royal Greenlandimmi Sisimiuni Ilulissanilu raajalerivii 2027-mi 2028-milu. Taakku aamma raajanik amigaateqalissappat?

- Aap, Aasianni Polar Seafoodip atugarisimasaatut aappaagu atugaqalissaagut. Tunisassiorfiit ukioq manna matoqqallattaareerput. Aappaagu matoqqanerusarnissaat naatsorsuutigineqarpoq.

- Taamaammat Polar Seafood raajaleriviit pillugit ukioq manna aaqqiissuteqarfigerusussimavarput, politikkerillu peqatigalugit ukiuni tulliuttuni qaleralinniarnermut tunngatillugu aaqqiissuteqarusuppugut. Ingerlatseqatigirffiit tamarmik akuerisinnaasaannik atugassaqarnissamik isumaqarsinnaavoq, taanna oqarpoq.

Neqeroorut Polar Seafoodimik itigartinneqartoq

Sooq unammillertissinni annerpaaq ikiortariaqarpisiuk?

- Tamanna imminnut assortuuppoq. Matumani Namminersorlutik Oqartussanit pigineqarnerput peqqutaavoq. Naalakkersuisut aaqqiissutissamik ujartueqqusigaangata naak Royal Greenland nammineq iluanaaruteqartussaanngikkaluartoq ujartuisarpugut.

- Polar Seafoodilli qaleralittassiissutit 5.000 tonsit Namminersorlutik Oqartussat aalisartunut nutaanut tunniutitassaat tamaasa tigujumallugit oqarluni neqeroorutitsinnik itigartitsisoq takugatsiguli aaqqiissutissamik illuatungeriit tamarmik akuerisinnaasaannik nassaarnissarput ajornakusuulerpoq, Toke Binzer oqarpoq.

Soorlu Sermitsiami allaaserineqareersutut Royal Greenland Polar Seafoodilu ukioq manna februaarimili isumaqatigiinniarput.

- Inussutissarsiortut aaqqiissutissatut periarfissanik siunnersuuteqartariaqarput, unamminartut taamaallaat politikkikkut aaqqinneqarsinnaanngillat, Aalisarnermut, Piniarnermut Nunalerinermullu Naalakkersuisoq Peter Borg februaarip naanerani tusagassiutitigut nalunaarummi allappoq.

Naalakkersuisup Aasianni suliffissuaq pillugu Polar Seafood oqaloqatigiuarlugu Atassutip Inatsisartunut ilaasortaatitaata Aqqalu C. Jerimiassenip paragraf 37 naapertorlugu apeqqutaanut akissummini ilisimatitsivoq.

Peter Borgip Polar Seafoodip Royal Greenlandillu “qaffasinnerpaaniit ataaniittunut siunnersortuarnikkut nunami suliffissaqartitsineq qanoq qulakkeerneqarsinnaanersoq” oqaloqatigiissutigeqqullugu qinnuigalugit aamma allappoq.

Isumaqatiginninniarnerit maannamut iluatsinngitsoorsimapput.

Naalakkersuisut Polar Seafoodimik qanimut oqaloqateqartut

Ulluni makkunanerpiaq Naalakkersuisut aamma Polar Seafood Greenland A/S, Aasianni suliffissaqartitsiniarneq attatiinnarumallugu tunisassiorfiullu tunisassiassanik tulaassuinerup qulakkeerneqarnissaa pillugu qanimut oqaloqatigiipput.

Naalakkersuisut nittartakkaminni apriilip 23-ani tusagassiutitigut nalunaarummi taama allapput.

Tusagassiutitigut nalunaarut naapertorlugu illuatungeriit tamanut pitsaasumik kinguneqarnissaa anguniarlugu ataatsimoorlutik aaqqiissuteqarnissamik ujartueqqatigiipput.

- Illuatungeriit isumaqatigiissutigaat sapinngisamik piaarnerpaamik aaqqiissuteqarnissamik nassaarniarniarlutik, tunisassiorfimmi sulisut, suliffeqarfiit attuumassuteqartut inoqarfimmiullu siunissaat paasisaqalertornissaallu ataqqillugu.

Illuartungeriit ataatsimoorussamik aaqqiissuteqassagunik ataatsimut oqariartoqatigiinnissaminnik nalunaaruteqarumapput.

Sermitsiap Naalakkersuisoq Peter Borg ilaatigut uku oqaaseqarfigeqqullugit apriilip 17-iani qinnutigaa:

Polar Seafood Greenlandip Royal Greenlandillu isumaqatiginninniarnerat unitsinneqartoq - ingerlatseqatigiiffiit taakku marluk imminnut soqutiginartumik niuernikkut aaqqiissutissarsisinnaasimanngimmata – Polar Seafoodilu naapertorlugu -ajalusoorsimasoq.

Peter Borgili Sermitsiap saaffiginninneranut suli akissuteqarsimanngilaq.