Københavnimi Fondsbørsimi ukiup ulluini siullerni Grønlandsbanken A/S-ip aktiai 29 procentimik qaffariarput.
- Donald Trump pineqarunarpoq, aningaasaliisarnermik ilisimatooq Per Hansen Nordnet-imeersoq oqarpoq.
Aningaasaliisartut Kalaallit Nunaanni aningaaserivinni piginneqataanissamut arlalinnik pissutissaqarsinnaasut, danskit aningaasaqarnermut tunngasunik nutaarsiassaqartitsiviannut Euroinvestor-imut Per Hansen oqarpoq.
Siullermik, Kalaallit Nunaanni aningaasaliisoqangaatsiarnissaanik takorluugaqarput. Aammali ilimagisinnaavaat suli annertunerusumik aningaasaliisoqassasoq, aningaasaliisarnermik ilisimatooq isumaqarpoq.
- Radioaviisimi, tv-aviisimi imaluunniit sapaatip akunneranut saqqummersartumi tamanna eqqaaneqaraangat inuit amerlanerusut eqqarsartarput tamanna tusagassiuutitigut sammineqangaatsiarsinnaasoq, aningaasarsiutigineqarsinnaasoq, Per Hansen Euroinvestorimut oqarpoq.
Aningaaserivik 2 milliarder koruunit missaannik naleqarpoq.
