Royal Greenlandip Ilulissani suliffissuani matunianngilaa

Polar Seafoodip Aasianni tunisassiorfiata matuneqarsinnaaneranik sapaatip akunnerini arlalinni ernumatitsisumut politikikkullu oqallisigineqaqisumut, Royal Greenlandip pisortaanera nutaaq, Toke Binzer maanna oqaaseqarpoq. 

Aamma Nunatsinni suliffeqarfiit annersaanni pisortaanerup taassuma, Ilulissani raajaleriffik aalisakkeriviutigisoq matuneqarnavianngitsoq oqaatigaa. 

– Royal Greenland immikkut periaaseqarluni piginnittuunermik aaqqissuussaavoq, niuernermili allat assigalugit atugassaqartitaalluta. Suliffeqarfiup isumannaatsumik ingerlanissaanik qulakkeerinninnissaq akisussaaffigaara – sulisunut najukkamilu innuttaasunut.

- Taamaattumik suliffissuaq ingerlalluartoq matussallugu aaqqiissutissaanngilaq, soorluttaaq raajartassiissutit tunitsivitsinni tunisassiornissamut pisariaqartitavut tunniussinnaanngilavut, Toke Binzer Sermitsiamut oqarpoq. 

Polar Seafoodip Aasianni suliffissuani ukiaru matusussanngorunaraalu Toke Binzer taama oqaaseqarpoq. 

Taamaalilluni Royal Greenlandip Ilulissani raajaleriffimminik aalisakkerivimminillu, 120-150-inik sulisulimmik, Aasianni suliffissuaq annaanniarlugu, matusinissaanik Polar Seafoodip siunnersuutaa taassuma itigartippaa.  

Aaqqiissutissatut siunnersuutit allat

Sapaatip akunnerani kingullermi Sermitsiami allaaserineqartutut aalisarnermut naalakkersuisup Peter Borgip, Demokraatit, Polar Seafoodip suliffissuata matunnginnissaa anguniarlugu aaqqiissutissamik nassaarnissani neriuutigiuarpaa.

Taamaattorli inuussutissarsiornermik ingerlatsisut, tassaasut Polar Seafood aamma Royal Greenland aaqqiissutissanik nassaarniartariaqartut naalakkersuisoq erseqqissaavoq.

- Polar Seafoodimik oqaloqatiginnilluarpugut. Isumaqatigiinniarnerini Aasianni suliffissuup qanoq annaanneqarsinnaanera pillugu aaqqiissutissanik arlalinnik siunnersuuteqarpugut. Oqaloqatigiinneq tamanna isumaqatiginninniarfiusumi ingerlatiinnarusupparput, Toke Binzer oqarpoq.

Royal Greenlandimi pisortaanerup aamma Polar Seafood Greenlandimi aamma Polar Seafood Denmarkimi pisortaanerit, Bent Salling aamma Henrik Leth, periarfissat misissorlugit ataatsimeeqatigiittarsimapput. Bent Salling-illi oqaasii naapertorlugit isumaqatigiissutigineqarsinnaasumik nassaartoqarsinnaasimanngilaq. Tamannalu nassuiaatissaqartoq Binzer erseqqissaavoq.

- Royal Greenland aaqqiissutissarsiornermut peqataasimavoq, aaqqiissutissamillu nassaarniarluni suleqataarusulluni. Aaqqiissutissalli piviusunngortinneqarsinnaasariaqarput. Aningaasatigut annaasaqarnitsinnik kinguneqartumik imaluunniit Ilulissani allanilu sulisutsinnut toqqissisimajunnaarsitsisumik isumaqatigiissuteqarsinnaanngilagut, Toke Binzer oqarpoq.

Ilulissani suliffissuaq pingaarutilik  

Royal Greenlandip Nunatsinni tunisassiorfiini 40-ngajaasuni suliffissuit annersaat pingasuusut Ilulissani, Sisimiuni Maniitsumilu ipput. Ilulissani Sisimiunilu suliffissuit raajanik tunisassiorfiupput, Maniitsumili suliffissuaq annerusumik saarullinnik tunisassiorfiulluni.

- Ilulissani suliffissuarput annertuumik aningaasaliiffiginikuuarput nutartertuarlugulu. Royal Greenlandimut illoqarfimmiunullu pingaaruteqarpoq, pisortaaneq Toke Binzer oqarpoq.

Sermitsiami siusinnerusukkut allaaserineqartutut, Royal Greenland Nunatsinni suliffissuaatiminut tunisassiorfiutiminullu aningaasaliinissaminik pilersaaruteqarpoq. Tunisassiornerup pitsaanerulersinnissaanut ukiuni tulliuttuni pingasuni tallimanilu 500-600 millionit koruunit aningaasaliissutigissavai, taamaalilluni tunisassiat nalingi pitsaanerpaamik atorneqarsinnaaniassammata.

Sisimiuni aningaasaliisoqarnissaanut akuersissut

Royal Greenlandip siulersuisuisa Sisimiuni tunisassiorfimmi raajanik tunisassiorfimmi inerisaanissamut raajanik uumatitsivimmut 20 millionit koruuninik aningaasaliinissaq akuersissutigeqqammerpaat.

Uumatitsivinni taakkunani raajat qalipaajarnissaannut uunneqarnissaannullu piareersarneqartassapput. Tamatuma saniatigut Ilulissani Sisimiunilu suliffissuarni tunisassiornermi atortorissaarusersuinerunissamut aningaasalersuisoqarniarpoq.

- Suliffissuaatitta ineriartortinnissaannut pitsanngorsarnissaannullu aningaasaliiuartarpugut, niuernitsinnut nunallu ilarujussuani suliffinnut pingaaruteqarmata, Toke Binzer oqarpoq.

Royal Greenlandip pisortaanera Polar Seafoodimik suleqateqarnissaminut ammavoq raajanik pilersuineq nunami tunisassiorfinnut tatisisoq aaqqinniarlugu. Tamannali suliffeqarfissuup Ilulissani suliffissuata matuneqarneratigut pinavianngitsoq oqaatigaa.

- Suliffeqarfiit akornanni suleqatigiinneq ajornartorsiutiginngilara. Kalaallit Nunaannut iluaqutaassappat suliffeqarfiit suleqatigiinnerat naleqartariaqarpoq. Aaqqiissutissalli illuatungeriinnut tamarmik isumaqarluartuusariaqarput, Ilulissanilu suliffissuarmik matusinissaq tamatumunnga ilaanngilaq, Toke Binzer naggasiivoq.