Arina Kleist aamma Johannes Ujo Müller, filmiliornermi ilitsersuisut, filminik marlunnik ukioq manna Københavnimi piviusulersaarutit pillugit festivalernerit annersaata CPH:DOX-ip ingerlanneqarnerani takutinneqarsinnaasunik suliaqarput.
Filmit allarpassuit Kalaallit Nunaanneersut Kalaallit Nunaallu pillugit filmiliat aamma takutinneqassapput.
- Filmiliara naatsoq nutaaq 'Tamatta Ataqatigiippugut' CPH:DOX-imi takutinneqassasoq ataqqinaatigalugu nalunaarutigisinnaavara, Arina Kleist filmiliornermi ilitsersuisartoq Qaqortormioq Facebookimi allappoq.
Filmi festivalimi marsip 11-ani, filmi naatsoq 'Erfalasorput' ilitsersuisumit assiliisumillu Johannes Ujo Müllerimit suliarineqartoq peqatigalugu, takuteqqaarneqassaaq.
Filmimi “Tamatta Ataqatigiippugut”-mi Sassuma Arnaanut allakkat sammineqarput, filmimilu “Erfalasorput”-mi nunatta erfalasua erfalasuliortorlu Thue Christiansen oqaluttuarineqarput.
- Erfalasoq pillugu oqaluttuaq kulturikkut anersaakkullu sorlaqarluarluni kinaassutsimik, tulluusimaarnermik ataatsimoornermillu ersersitsisuuvoq,“ Johannes Ujo Müllerip filmiliaa naatsoq CPH:DOX-imi taama allaatigineqarpoq.
Filmi inuttallu ‘Erfalasorput’-mi peqataasut qaammammi matumani siusinnerusukkut nunanit tamalaanit peqataaffigineqartumik filmiliornermik unammisitsinermi ‘Oniros Film Awards 2026’-mi New Yorkimiittumi pingasunik nersornaaserneqarput.
Filmilli naatsut taakku marluk ukioq manna festivalimi takutinneqartut Kalaallit Nunaanneersut Kalaallit Nunaallu pillugu filmiliat kisiartarinngilaat.
Joe Derricksip filmiliaa ‘Qajaq Man’ siorna Nuuk Filmfestivalimi takutinneqarlunilu naammassillugu immiunneqartoq CPH:DOX-imi marsip aqqarnani nunarsuaq tamakkerlugu takuteqqaarneqassaaq. Filmi naammassisaq pillugu pilerisaarut filminut festivalip nittartagaani takuneqarsinnaavoq.
CPH:DOX Københavnimi sumiiffinni assigiinngitsuni marsip 11-aniit 22-anut ingerlanneqassaaq.
