Sermiligaami immami inuuneq

Qajarissani qaqortoq atorlugu qilalukkat qernertat piniarpai.

Ingerlaarnera malinnaaffigeqqissaarlugu sumukassanersorlu paasiniarlugu. Ukiut 20-t sinnerlugit misilittagaqarnermigut qilalukkanik qernertanik piniartarnini nuannarinerpaavaa. Aasaanerani Kangerlussuarmut qilalukkanik qernertanik piniariartarpoq – ileqquliussimasani ukiunilu 27-ni ingerlataa.

Qajarissani sungiusimalluakkani atorlugu arfanniartarneq ataataminit ilinniarpaa, taassumalu piniarnermik uumasullu inuunerannik ilisimasani tamaasa ingerlateqqippai.

Arfermik pisaqarnermi nuannaarneq, neqaanik mamartunik nerinerup aamma immamut qilalukkamullu qanittuararsuunermik misigisimanerup nuannaalersitsisarnera oqaasertaleruminaappoq.

Simujoq Nathanielsen Sermiligaami, tunup sineriaani Tasiilamit 100 kilometerit missaanni avannarpasissulimmiittumi najugaqarpoq. Inuit 200-t inorlugit amerlassuseqartut nunaqqatigalugit oqaatigaa.

- Inuunera tamaat aalisartuullungalu piniartuuvunga, AG-mut oqaluttuarpoq.

57-inik ukioqalissaaq, Tunumi nunaqarfimmi aalisartoqarfimmi piniartoqarfiusumilu Sermiligaami inunngorpoq peroriartorlunilu. Sermersuaq kusanartoq sermersuarmik avatangerneqarsimavoq uumasorpassuillu soorlu qilalukkat qernertat nannullu tassaniipput. Simujoq nulianilu tassani najugaqarput. Sisamanik meeraqarput marlunnillu ernutaqarlutik.

Simujoq piniarnermik ilisimasaminik tamanik — uumasut sikullu ingerlaarneranik — ataatagigaluaminit ilinniartinneqarpoq.

- Meeraallungali ataatama sungiusarpaanga. Natsersuarnillu piniariaraangat angalaqatigisarpara, umiatsiamilu uanga aquttuusarpunga, oqaluttuarpoq.

Pinngortitamiittuarsimapput, tassanilu angerlarsimasutut misigiuarpoq. Pinngortitamiinneq inuunerani pissusissamisoorluinnarpoq, meeraaneraniilli ulloq naallugu ataatani peqatigalugu piniarfinniittarneq nalinginnaalluinnalersimavoq.

Tunisassiorfik amigaataasoq

Simujoq nunaqarfimmini maanna aalisartuullunilu piniartuuvoq.

- Ukiuunerani qaleralinniarneq, suluppaagarniarneq saarullinniarnerlu inuussutissarsiutigaakka. Kangerlummi qaleralinnik ulikkaarpoq, oqarpoq.

Sermiligaaq tunisassiorfeqanngimmat Simujoq Kuummiunut pisaminik tulaasarpoq. Silap pissusiata allanngoriartornera ilaatigut sikup siumut oqaatiguminaassinera pissutigalugu Sermiligaami aalisartut piniartullu ulluinnarni ajornartorsiuteqaleraluttuinnarput.

- Silap pissusiata allanngoriartornera piniartunut, ingammik inuussutissarsiutigalugu aalisartunut nunaqarfinni tunisassiorfiunngitsuni najugaqartunut, ajornartorsiutaavoq. Aalisartutut inuuniarneq ajornakusoorpoq, oqarpoq.

Siku qajannarsigaluttuinnarmat Sermiligaami qimussertartut ikiliartorput.

- Ullumikkut inuit qulit inorlugit qimmeqarput, siornatigut 30-t sinneqarnikuugaluarput, Simujoq Nathanielsen oqarpoq.

Tunitsivimmut Kuummiiniittumut aqqut aatsaat apriilimi juunimiluunniit isumannaatsumik ingerlavigineqarsinnaalertartoq oqarpoq. Siornatigut qimussimik Kuummiinut tunisisoqartarsimavoq, sikulli naatsorsoruminaannera pissutigalugu tamanna ajornarsisimavoq.

- Assersuutigalugu maannakkut siku saappallaarpoq, sulilu qimussimik angalasoqarsimanngilaq. Siornatigut siku naatsorsoruminarnerugallarmat assersuutigalugu juullikkunni Kuummiinut qimussertoqarsinnaagaluarpoq, Simujq oqarpoq.

Pisassiissutit aalisartut piniartullu inuuneranut annertuumik nipilersoqataalluinnarput, unammiligassarujussuarnillu malitseqartarlutik.

- Pingaartumik Tasiilap eqqaani nannuttassiissutit qilalukkallu qernertat pisassiissutigineqartut piniartunit ajornartorsiutitut isigineqarput. Tamanna pakatsissutigeqaarput, pisassiissutillu agguataarneqarnerat naleqqutinngitsutut isigaarput, oqarpoq.

Kinguaariit tullii

Naak siku naatsorsuminaakkaluartoq tunisassiorfimmillu amigaateqartoqaraluartoq Simujop Sermiligaami aalisartuuneq nuannarilluinnarpaa.

- Sermiligaami aalisartut piniartullu ikioqatigiilluartaqaagut, tamanna nuannareqaara qujamasuutigalugulu, Simujoq Nathanielsen oqarpoq.

Aammattaaq meeqqat piniarnermik kulturimut peqataatinnissaat pingaaruteqarpoq.

Marlunnik ernutaqarpoq, taakkualu nuannaarutigeqisaanik piniarnermik soqutigisaqarluarput.

- Nukappiaqqat pikkorissorujussuupput, sapinngisannillu ilinniartinniartarpakka. Nukarleq siorna arfineq-marlunnik ukioqarluni natsersuarmik pernarpoq, nuannaaqaanga, oqaluttuarpoq.

Simujoq ukiup qanoq ilinerani piniagassanik pilisarpoq. Qilalukkat qernertat saniatigut puisinik, natsersuarnik, suluppaakkanik qaleralinnillu piniartarpoq.

Simujoq nulianilu taama inuupput. Nuliata najortuarpaa, piniarnermilu pinngotsoorsinnaanngisaanik tapersersoqqissaartarlugu. Inuiaqatigiinni ataqatigilluartuni, ilaqutariinneq qanilaartuunerlu pingaartinneqarluni. Piniarnermut, immamut silamullu tunngasunik ilisimasat kinguaariikkuutaani kingornuttakkat Simujop meeqqaminut ernuttaminullu ingerlateqqinniarsarisarpai.

Sermiligaami unammilligassaqaraluartoq nunaqarfik tulluusimaarnermik, ileqqutoqqanik pinngortitamullu atalluinnartumik inuuneruvoq — inuiaqatigiit imaanut, sikumut imminnullu qanittumi inuusut.