Rasmus Lyberth Folkemusikkens Hall of Famemiilissasoq, Tønder Festival tusagassiuutitigut nalunaarummi allappoq.
Erinarsortartoq tassannga nersorneqarnikut tallimassaraat. Folkmusikkens Hall of Fame Tønder Festival Fondimit 2021-mi pilersinneqarpoq, inuiaallu nipilersoriaasiannik aamma qanga nipilersoriaatsit ullutsinni nipilersoriaatsimik akoorlugit suliaqartunut, "roots"-imik taaneqartartumik, nersornaasiuttagaalluni.
- Nammineq erinniaminik nunamini pinngortitaq, ineriartorneq innuttaasullu atugaat pillugit tinguartinnartumik erinarsortarpoq. Oqaatsit paasisinnaanngikkaluaraanniluunniit suna pineqarnersoq paasineqarsinnaanngortapaa - Londonimi Royal Albert Hallimi Tønder Festivalimiluunniit tupermi appisimaarnera apeqquatanani, tunngavilersuutigineqartumi ilaatigut allassimavoq.
Malunnartinniarlugu nalliuttorsiutigineqassasoq
Tamanna malunnartinniarlugu Tønderimi Hagge’s Musik Pub-imi novembarip 15-ianni nalliuttorsiortoqassaaq.
Rasmus Lyberth nipilersortartut taalliortullu Folkemusikkens Hall of Famemiilersut tallimassaraat. Allat sisamat tassaapput Povl Dissing, Niels Hausgaard, Finbar Furey aamma Eleanor Shanley, festivalimit ilisimatitsissutigineqarpoq.
Nersorinninnermi eqqumiitsuliaq inuusaq qisummik sanaaq taallartalik tunniunneqassaaq.
