Uiloq Enoksen aamma Abia Abelsen Nielsen Nanortalimmi innuttaasunut juullimi aaqqissuussinermi "Neriunaatilittut" toqqarneqarput. Kommune Kujalleq tusagassiuutitigut nalunaarummi allappoq.
"Sungiusaasutsialammik" aamma toqqaasoqarpoq. Minik Stephansen aamma Benjamin L. Chemnitz sungiusaasutsialattut toqqarneqarput. Rosine Lange aamma Ari Enoksen "Timersullammattut" toqqarneqarput.
Nanortallip timersortarfiani nalliuttorsiornermi nipilersortoqarpoq, Luciamik ingerlaaqatigiittoqarluni, palasi oqalugiarluni meeqqallu nuannersumik isiginnaartitsillutik.
- Arnat Peqatigiit aamma Klub Alummiumi isertartut sinniisai kissartutoqatigiinnermik ingerlatsisoralugit, angummik arnamillu saqqummiisulerlutik ulloq nuannersumik ataatsimoorfiusumillu ingerlavoq, kujataani kommunimit allapput.
Luciamik ingerlaaqatigiittoqarnerata kingorna qulliit qaminneqarput, tupaallannartumillu pisoqarluni.
- Najuuttut nuannarilluagaannik uaajeertoqarpoq, Nanortalimmi kulturimut sunngiffimmullu suliaqartoq Samuel Simonsen tusagassiuutitigut nalunaarummi oqarpoq.
