Uilu Pedersenip ilusilersuisartullu Susanne Jensenip meeqqanut atuakkiartik Pilu nersornaaserneqarnissamut innersuunneqaqqinnera nuannaarutigisinnaavaat. Oqaluttuaq taalliarpalaartumik allataq sapiissuseqarnermut, imminut tatiginermut, ersineq nukinngortillugu namminerlu aqqutissamik ujartuinermut tunngavoq.
Atuagaq Nunat Avannarliit Siunnersuisoqatigiit meeqqanut inuusuttunullu atuakkianut nersornaasiuttagaannut siorna innersuunneqarpoq, nersornaaserneqaranili. Maannalu allamik periarfissaqalerpoq; tamatumuuna 60.000 koruuninik aningaasartalimmik. Islandimi Nunat Avannarliit Killiit Siunnersuisoqatigiivisa ukiumoortumik aggustip 31-ani ataatsimiinneranni nersornaasiisoqassaaq.
Nunat Avannarliit Killiit Siunnersuisoqatigiivi atuagaq Pilu pillugu ima allapput:
“Oqaluttuaq Kalaallit Nunaata pinngortitaanut kulturianut attuumassuteqarluinnarpoq, sammineqartorli tamanut tunngassuteqarluni. Kalaallit imaq, qaqqat uumasullu pingaarutilimmik inissisimasuutillugit oqaluttuatoqaannit aallaaveqarpoq, aamma meeqqat tamanut namminneq piginnaasaminnik qularutiginnittunut saaffiginnittuulluni".
Ataqqinaat annertooq
Pilup innersuunneqarnera Uilu Pedersenimut ataqqinaataavoq annertooq, taassumami perngaammik atuakkiaraa 2024-mi novembarimi saqqummertoq.
Uilu Pedersen, Aasianni peroriartorsimasoq, cand.psych.-itut ilinniagaqarpoq. 2014-imi Nuummut nuuppoq, taamanimillu tarnip pissusaanik ilisimasalitut sulilluni. Assilissat kusanartut nuannersullu Susanne Jensenimit, Nuummi peroriartortumit, ilusilersorneqarput. Taanna perorsaasutut aamma eqqumiitsuliornermik katsorsaasartutut ilinniagaqarpoq, Nuummilu najugaqarluni ilaatigut meeqqanik assilialiornermik ilinniartitsisarluni.
Atuakkat allat marluk innersuunneqartut tassaapput:
