Parnaq: Naalagianngilagut — festivalerpugut

Parnaq Hammond Iversen, rappertartoq nuimasoq, Sisimiuni scenep tunuani pissanganeq malunnarsimaqisoq oqaluttuaraa.

Arctic Sounds-imi nipilersortup bas-iata iigaq akimorlugu tusaaneqarsinnaanerani Parnaq Hammond Iversen, Tarrak, Angukasik Filukalu Underbergimik ileqqoq malillugu najorseqatigiipput.

Puiaasaaqqat kajortut ammarneqarlutillu sianiutinut nanertuutaasunut nakorsaatitut, ingammik Parnamut tullinnguuttussamut, agguaanneqarput.

- Nukissamik immitsinnut tuniorarlutalu appittussat tullii eqitaarlugit nuannersumik takutitsinissamik kissaappagut, taanna oqaluttuarpoq.

Parnaq Hammond Iversen nuffaseqqagaluarluni festivalimut peqataasunut nuannersumik misigisaqartitsiniarpoq.

- Tusarnaariat hiphopimik pitsaanerpaamik misigisaqartinnissaat anguniagaraara. Uagut kalaallit rappertartuusugut oqatta ipittuuneri pillugit ilisimaneqarpugut, taamatullu sapiissuseqarlunga eqqorluartumillu oqariartuuteqarlunga scenemi takutitserusuppunga, Parnaq nassuiaavoq.

Scenemi

Tusarnaartut Parnaq unnummi tusarnaartitsisussanngortinneqarmat scenemut qanillipput.

Appisimaarnermini inuit tupigusunnertik kiinnaminni ersersikkaat scenemit takusinnaavaa. Kingorna Arctic Sounds-ip aaqqissuussaa nuannaarutigaa, aaqqissuisut qullilerisullu appisimaarnermini silarsuarmi pitsaanerpaamik appisimaartitsimmata immikkut qujaffigai.

- Appittussatut nalunaarutigineqarniariartunga inuit qanoq amerlatigisut takkussuuttut takugakkit tupaallaatigeqaara. Teknikkikkut piareersarluarneqarsimanera pissutigalugu toqqissisimasutut misigivunga. Aaqqissuisut qullilerisullu pitsaanerpaanik sinaakkuteqartitsimmata nersualaarpakka, oqaluttuarpoq nangillunilu:

- Scenemi appisimaarluni nuannaarneq oqaatigineqarsinnaanngilaq. Tusarnaartut erinarsoqatigigaanganga ataatsimoorneq immikkuullarissoq pilersinneqartarpoq, tamannalu qamuuna malugisinnaavara. Kalaallit taama tapersersueqatigiinnerput takullugu tulluusimaarutigeqaara, tassami tusarnaartitsineruinnarnani pinnani festerneq ataatsimoorluta pilersipparput.

Queen P-p erinarsuutit ilisimaneqarnerpaat ilaatigut Ningiu Freestyle, Old School Native aamma tusarnaarianit nuannarineqarnerpaaq Qitsuk feat. Angukasik atorpai. Parnap rapperluni erinarsuutip Qitsuup nuannarineqarluarnera tupaallaatigisimallugu oqaluttuarpoq.

- Appisimaarnera naammassigakku scenemililu aqqarama inersuaq erinarsoqatigiittunik ulikkaarpoq. ’Aammalu! Aammalu!’ ima sakkortutigaaq inimi tamarmi tusarsaalluni, allamik iliuuseqarnanga immikkut piumasaattut appeqqinniarlunga utiinnarpunga , Hammond Iversen oqarpoq.

Parnap appeqqinnini naammassigamiuk scenemit aqqarpoq. Scenep tunuanukarami tusarnaartitsineq naggaserlugu Underbergitoqqippoq.

Qiimmattarneq tupigusuutiginninnerlu

Tusarnaariat nuannaarnertik isertuutinngilaat, kingusinnerusukkullu Parnaq isermat festerneq aallartilluinnartoq oqaluttuuppaat.

Appisimaarnera nalliuttorsiornerup naggataarnersiutigineqarnerata aallartinneratut inuppassuit isigaat.

- Naalagianngilagummi, festivalerpugut, taamaammat nuannisaqatigiittoqassaaq. Tusarnaariat qiimmatsinniaraanni tupaallatsitsineq sakkussatut pingaaruteqartoq paasivara, Parnaq illarluni oqarpoq.

Parnaq Hammond Iversenip JJ Paulomik Tanzaniameersumik, festivalimi aamma tusarnaartitsisumik naapitsinini nuannaarutigingaarlugu oqaluttuaraa. Taanna nipilersortartuullunilu isiginnaartitsisartuuvoq, naapinneralu sunnerneqaatigeqaa.

- Ilaatigut JJ Paulo naapippara, taannalu imminut tunniusimalluinnarpoq. Uagut kalaallit naapimmatigut immikkut ittumik pisoqarpoq. Inuit qamuuna killitsippasipput. Kalaallit tassanngaannaq isigineqanngitsutut qittatileriataarput. Tamanna festivalimi misigisat tupaallaatigisama ilagaat. Taanna festivalimi pisuni uannut pingaarnersaavoq, Hammond Iversen tupigusulluni oqaluttuarpoq.

Queen P-p alloriarnera tulliuttoq

Parnaq inuusuttunut eqqumiitsuliortunut arlalinnut, „Nuussuarmiuutikka“-nik taasaminut, nipilersukkanik saqqummersitsileruttortunut maligassiuisuuvoq.

Aammattaaq saqqummersitseqqaarnissaminut, ulluni tulliuttuni ullulerneqartussamut, tunngatillugu pimoorussilluni suliaqarpoq.

- Qilanaarutissaqarpusi, Parnaq Hammeken Iversen saqqummersitassani siulleq pillugu oqarpoq.

Parnap nuannarinnitsini akerlilersorneqaraluaraangamilluunniit tunuarsimaanngisaannaqqullugit kajumissaarpai.

- Sumiiffinni qanorluunniit ittuni inuiaqatigiinnilu qanorluunniit ittuni inuugaluarlusi imminut tunuarsimaartillusi maniguunngisaannaritsi. Namminiugitsi. Ghettomi Kalaallit Nunaataluunniit ‘Beverly Hillsiani’, Qinngorpumi peroriartorsimaguit apeqqutaanngilaq. Immissinnut killilernaveersaaritsi, Kalaallit Nunaanni rappertartut dronningiat Parnaq Hammond Iversen naggasiivoq.