Qatsissumi misigisassarsiorneq: Najannguup nunarsuami qaqqat portunersaat majuarniarpaa

Kiffaanngissuseq. Eqqarsaatit akornutaasut eqqarsaatiginagit piffissami matumaniittuaannarneq. Tassani nalunaaqutaq aalajangiisuunngilaq. Pinngortitaq aalajangiisuuvoq. Ullup qanoq innissaa pinngortitap aalajangertarpaa. Aputeqarpallaarpat ingerlaarfik naalisarneqartariaqarpoq. Taava naleqqussartoqartarpoq – tassanngaanniillu ingerlaartoqartarluni. Soorlu siuaasagut siornatigut taama iliortartut.

Taamaammat qaqqamut qaqisarneq nuannaraa. Nepalimi ukiualuit matuma siorna, Mount Everestip qaava isigiinnarlugu, tammaarsimaffimmiippoq. Pigereerlugu tassanngaannaq paasivaa. Pinngortitaq — aput, qaqqat pissutsillu takorloorsimanngisaannakkaminik takusinnaavai.

Kalaaleq pinngortitami angalaartartutut peroriartorsimavoq, tamannalu qaqqani inuunermini immikkut nakussatsissutigaa.

Najannguaq Berthelsenip nunarsuarmi qaqqat portunerpaat arfineq-marluk ukiut marluk tulliuttut ingerlaneranni qaqissallugit takorloorpaa. Angalanini juulimi  aallartissavaa, taamanikkussamut Ruslandimukarluni ukiorpassuarni takorluukkani piviusunngortissavaa.

- Siullermik qaqqaq Elbrus juulip arfernani qaqissavara, Najannguaq Berthelsen AG-mut oqarpoq.

Mount Elbrus 5642 meterisut portutigisoq, Europami qaqqat portunersaat, Kaukasusip qaqqarsuinut Ruslandimiittumiittunut ilaavoq. Tassani Najannguaq Berthelsen  anguniakkaminik anguniagaqarusunnermini alloriaqqaassaaq.

Piginnaasaqarfigereeraa

Najannguaq Berthelsen 26-nik ukioqarpoq, Sisimiuni inunngorlunilu peroriartorpoq, meeraallunili pinngortitaq qanimut atassuteqarfigalugu.

- Peroriartorninni pinngortitamiittorujussuuvugut, nunanut allanut angalasalernerma kultoorinillu allanik naapitsisalernerma kingorna,  tamanna uannut qanoq pingaaruteqartigisoq paasivara, oqarpoq.

Najannguup kalaaliulluni pinngortitamut pissusissamisoortumik qanilaartuunini paasisimavaa.

- Pinngortitami angalanermut — pingaartumik qaqqani angalanermut — tunngatillugu ilisimasaqarluarlutalu piginnaasaqarluartugut paasivara. Taakkualu angajoqqaatsinniit ilikkartarpagut, ulluinnarsiutigalugit. Taama ilisimasaqarneq kultoorini allani naliginnaanngitsuusoq paasilerpara, oqarpoq.

Ruslandimi qaqqap Mount Elbrusip sivingasartaaniit angalaneq allarluinnarmut ingerlaqqissaaq. Tassami Amerikami naalagaaffimmi Washingtonimiittoq Glacier Peak - innernik anitsissartutut avinngarusimanerpaat ilaat Cascade Range tullinnguutissavaa. Mount Elbrusimiinnerminiit ullut 18-mit qaangiuppata taanna tikissavaa.

Kaukasusip qaqqaasa Ruslandimi qaqqat portusuut qaqqarsuarnit allanit portunerusut, USA-mi qaqqat inoqanngitsut orpippassuarnik alutornartunik avatangerneqartut tikikkuminaatsuussapput. Pissutsit nutaat unammillernartullu nutaat. Tamannali takorluukkap piviusunngortinnissaanut qanillisaataannaassaaq, tassa nunarsuarmi qaqqat portunersaasa arfineq-marluusut qaqinissaat.

Everest isumassarsiorfittut

Taanna ukiut pingasut matuma siorna - 23-nik ukioqarluni -  qaqqamut Mount Everestimut qaninniarluni Nepalimiippoq.

- Mount Everestimut qaqinissara takorloortuaannarnikuuara, qanillerusussimavaralu, Najannguaq Berthelsen oqarpoq.

Base campimiippoq, tassa qaqqasiortartut Mount Everestimut qaqiniarnerminni unnuiffigisartagaanni, piareersarfianni sungiusarfiannilu.

- Misigisaq puigunaappoq, tamannalu pissutigalugu qaqqap Everestip qaqinnissaa aalajangiusimalluinnarpara, taanna oqaluttuarpoq.

Base campimi aqqut pilersaarusiorneqartarlunilu, atortorissaarutit piareersarneqartarlutillu timi 5000 meterisut qutsitsigisumi silaannarmut naqitsinikinnerusumut nalimmassarneqartarpoq.

- Timikkut malugisinnaavara. Ullaakkut arriitsumik pisuttarpunga, nalinginnaasumillu seqernup nuinnginnerani aallartarlunga. Nerilluarsimanngikkaanni imerluarsimanngikkaanniluunniit, niaqorlunneq imaluunniit portusuumiinnerup ilisarnaatai erngerluni malugineqartarput, Najannguaq Berthelsen eqqaamasalikkersaarpoq.

Najannguaq ilinniarnertuunngorniarfimmi ilinniartuulluni ikinngutini ilagalugit silap allanngorartuarnerani pinngortitami angalasinnaanini sungiusarniarlugu tupermi unnuisalerpoq.

- Perluleraangat ima oqartarpugut: Ajunngilaq, ullut ilaanni qaqqamut Everestimut qaqissaagut, tamannalu qaqqamut Mount Everestimut sanilliullugu suunngilluinnarpoq, taanna oqaluttuarpoq.

Allanik isumassarsisitsinissaq neriuutigigaa

Qaqqarsuup Glacier Peak-ip qaqinerata kingorna Kilimanjaro — Afrikami qaqqat portunersaraat nunarsuarmilu qaqqani narsaamanermik ungaluneqarsimasut portunersaat - tullinnguutissavaa. Nunarsuarmi qaqqat portunersaasa arfineq-marluk qaqinissaanut pilersaarutini ingerlateqqissavaa. Matterhorn 4.478 miiterisut portutigisoq Willas-Alpernep Schweiz-ip aamma Ilatilap killeqarfianniittoq, majuassallugu tullinnguutissavaa, taanna "The Seven Summit"-inut pisortatigoortumik ilaatinneqanngikkaluartoq ilisarnarluinnartut unammilernartullu ilagaat.

Sikuiuitsumi kujallermi Vinsonip Amerikamilu Kujallermi Aconcaguap qaqugu qaqiniarnissaat aalajangerneqareerpoq, qaqqat Everest Denalilu qaqugu qaqinneqassanersut suli aalajangerneqanngilaq.

- Mount Everest 2028-mi apriilimi qaqqasiussallugu naatsorsuutigaara, taamaakkaluartoq suli qularnarpoq. Mount Denaililu 2027-mi martsip qaammataani qaqqasiussallugu naatsorsuutigaara. Qaqqat tallimat qaqisimaleriarukkit piffissamik annertunermik atuisariaqarnerlunga, immaqaluunniit qaqqasiornissama tullia ingerlatissanerlugu nalilersussavara, Najaaraq Berthelsen oqarpoq.

Najannguaq Berthelsen angalaqqaarnissami tungaanut Norgemi Altami piareersarpoq, tassanilu silami takornariartitsisartutut ilinniarpoq.

- Ullut tamangajaasa qaqqamut qaqisarpunga. Nunaannarmi najugaqarpunga, aalasorujussuullungalu, oqaluttuarpoq.

- Pissangaqaanga, ilaatigullu sinnattuinnarnanga uannut eqqaasittariaqartarpunga. Soorunalimi aamma ernumavunga, merserusulaartarniarlungalu, oqarpoq.

Najannguup qaqqat portunersaasa arfineq-marluk qaqinerisigut kalaallit pinngortitami piginnaasaqarnerat, qaammaasaqarnerat ilisimasaqarluarnerallu takutissinnaassallugu neriuutigaa.

- Kalaallit allat imminut unammillernissamut kajumilersissinnaassallugit aamma neriuppunga, takorluukkammi piviusunngortinneqariaannaapput, taanna oqaluttuarpoq.