Jørgine Frederiksen 75-inik ukiulik ilaqutariiullutik Tasiusami savaateqarfimminni ukiuni 50-ini takornarialerisuullunilu taakkununnga kaffillertartuuvoq.
Umiarsuit takornariartaatit kingullersaat 530-nik ilaasulik Kujataaneereerluni aallarmat, Jørgine takornarianut naggammik kaffillersimalertoq, inuussutissarsiutinik siuarsaavik Innovation South Greenland Facebookimi quppernermini allappoq.
- Jørgine Kujataani takornarialerinermi ineriartortitsinermi pingaaruteqartuuvoq, ilaatigut Qassiarsummi ilisarnaatinik takusarneqarluartartunik aallarnisaasoqataasimalluni. Tassalu sanaartoqqitani: Erik Aappalaartup illua takisooq - nuliatalu Tjodhildep oqaluffianut suleqataasimalluni. Leif Iluanaarajuullu eqqaassutissaa Qassiarsummi napparneqarnissaa aamma sulissutigisimallugu, Innovation South Greenland Facebookimi quppernermini aamma allappoq.
