Kangerlussuarmi meeqqerivik ”Nuka” meeqqanut aavartitsinissamik aaqqissuussivoq. Qeqqata Kommunia Facebookimi quppernermini allappoq. - Nunatsinni meeqqerivinni siullersaalluta meeqqat peqatigalugit tuttunniarpugut, aaqqissuussarlu kusanartumik angusaqarfiulluarlunilu naammassivoq. Sulisut arnat kisimik peqataapput, kommune saqqummiussamini allappoq.
- Meeqqat suna soqutigineraat sunalu ilanngullugu pilersaarutigerusunneraat apersuinermi pilersaarut aallartippoq. Meeqqap ataatsip tallimanik ukiullip nammineq tuttunniarusulluni siunnersuutigaa, Qeqqata Kommunia allappoq.
Sulisut siunnersuutigineqartoq tigulluarpaat tamannalu pillugu periarfissat misissoqqissaareerlugit qinnuteqaatinik suliaqartoqarpoq. Meeqqat tuttunniarnerminni takisuumik pisunnissaannik oqarfigeqattaarlugit piareersarneqarsimasut, kommunimit paasissutissiissutigineqarpoq.
- Meeqqat nassuiaanneqarlutik piffissami sivisuumi pisunnissaannik piareersarluarneqarput. Meeqqat ilaat, tuttunniarnermik misilittagaqarluartoq, tuttunniarnernut tunngatillugu meeraqatiminut ilitsersueqataavoq, misilittakkanilu oqaluttuaralugit allat piareersarnissaanut ikiorlugit, nalunaarummi allassimavoq.
Meeqqat tallimanik ukiullit marluk ataaserlu sisamanik ukiulik peqataapput. Tuttunniarneq akunnerni arfinilinni ingerlarpoq, 10 kilometerinillu takissusilik pisuffigineqarluni.
