USA-p nunatsinni sinniisoqarfia nutaaq anginerusoq ullumi atoqqaartinneqassaaq.
Nuna pissaanilissuaq manna tikillugu Nuummi umiarsualiviup eqqaani illumi mikinerusumi attartukkami inissisimasimagaluartoq, sisamanngornermi sinniisoqarfimmik pingasunik quleriilimmik 3000 kvadratmeterinillu angissusililimmik illoqarfiit pingaarnersaata qeqqani ammaassaaq.
USA umiarsualivimmi Issittumi Sakkutooqarfimmit illumik 2020-miilli attartorsimavoq, maannali inimut anginerumut nuuttussanngorpoq, piffissami Kalaallit Nunaata Danmarkillu kiisalu USA-p akunneranni pissutsit aalassaqqanerisa nalerpiaanni.
USA-p præsidentiata Donald Trumpip arlaleriarluni nunarput tiguarusullugu oqaatigisareerpaa.
Sinniisoqarfimmut akerliussutsimik takutitsineq
Tamanna pissutigalugu sisamanngornermi ammaanersiortoqarpat innuttaasut akerliussutsimik takutitsissallutik nalunaarsimapput. Ammaanersiornermittaaq Naalakkersuisut siulittaasua Jens-Frederik Nielsen peqataassanani nalunaarutigereerpaa.
Akerliussutsimik takutitsisut allagartarsuarnik tigumiaqarlutik USA-mut naammaginninnginnertik ersersinniarlugu sinniisoqarfiup tungaanukassapput, tassanilu illorsuaq tununngallugu minutsini marlunni nipaallisimallutik nikorfassallutik.
USA-p Nuummi sinniisoqarfia 2020-mi ammaqqinneqarmat Naalakkersuisut arlallit peqataanikuupput.
