Kalaallit Nunaata ataatsimoornissamik pisariaqartitsinerani, timersorneq ataatsimoorfiuvoq

Katuaq nalliuttorsiornermi ataatsimoorfiuvoq.

Natersuaq aappalaartoq siaaneqaarpoq, puiaasat qummuattanik imallit ammarneqarput, inersuarmullu isaariaq inunnit neriuuteqarluartunik, illartunit kipitsaartunit takorniuttoqarluni ulikkaarpoq. Taama misigisaqarnissaq pisariaqarluinnarpoq. Naak politikkikkut sammisat isumakuluutillu kalaallit ilarpassuisa ulluinnarni inuuneranni annertuumik inissisimaffeqaraluartut unnuk taanna tamatuma akerlerluinnaanik sammiveqassaaq: timersorneq, angusat timersornerullu ataatsimoortitsisarsinnaanera.

Katuaq nalliuttorsiornermi ataatsimoorfiuvoq.

Unnuk ataatsimoorfiusoq

Takkussuuttut amerlaqaat, takkussimasullu akornanni ilaatigut takuneqarsinnaapput borgmester Avaaraq Olsen, Ilinniartitaanermut, Kultureqarnermut, Timersornermut Ilageeqarnermullu Naalakkersuisoq Nivi Olsen – aamma soorunami Kalaallit Nunaanni Timersoqatigiit Kattuffianni siulittaasoq Claus Nielsen. Ukioq manna saqqqummiisut tassaapput Noah Mølgaard aamma Laila Platoú, unnuullu oqariartuutaa eqqarsaatigalugu aaqqissuineq Lailamut immikkut pingaaruteqarpoq – tulluusimaarutigineqarujussuarlunilu.

- Saqqummiisusinnaanera uannut assut pingaaruteqarpoq. Maligassiuisut Show-i uannut ataatsimoornermut, ataqatigiinnermut nuannaarnermullu assersuutaalluarpoq, tamannalu piffissami Kalaallit Nunaanni toqqissisimaffiunngitsumi avissaartuuffiusumilu pisariaqartipparput, arsaattartoq saqqummiisorlu Laila Platoú oqarpoq nangillunilu:

- Inunnik katersuutsiteqataasinnaanera, timersornermik nuannaarutiginnissinnaaneq nuannersunillu siammarterisinnaanera uannut pingaaruteqangaarpoq. Neriuppunga aallakaatitassiaq isiginnaarianut isiginnaartunullu qasukkarsaataassasoq – aamma ataatsimoornerup nukinganit eqqaasitsissutaassalluni, Laila nangippoq.

Hans Lyngep inersuaa kusanartumik pinnersaaserneqarsimavoq. Qilammiit erfalasoq nivingavoq, nalliuttorsiornerlu aallartinneqarpoq isiginnaartut nikuillutik erinarsoqatigiillutik atormassuk Nunarput Utoqqarsuanngoravit.

Maligassiuisut Showimi ajugaasut

Nersornaat tunniunneqartoq siulleq tassaavoq ”Ukiup Sungiusaasua”. Hansinannguaq Siegstad Ilulissaneersoq nersornaaserneqarpoq, taanna meeqqanik inuusuttunillu I-69-imi peqataatitsinerulernissaminnut suliaqarsimaneranut nersornaaserneqarpoq. Tulliullugu ”Ukiup Timersornikkut Angusarissaarnerpaaq”, taekwondortartoq Lars Lennert Abelsen-mut nersornaat tunniunneqarpoq. Lars 14-inik ukioqarlunili nunarsuaq tamakkerlugu unammisarpoq, 2025-lu immikkut ittumik angusarissaarfiuvoq, ilaatigut EM-imi bronzennalluni. ”Ukiup aqutsisua” Anni Damgaardimut tunniunneqarpoq, taanna ukiuni 50-ingajanni B-67 Badmintonimi siulittaasuuvoq. Qujalluni oqalugiarnermini inuusuttut kajumissaarpai ileqqup ingerlateqqinnissaanut timersortarnermilu namminneq ilikkakkatik timersortartunut utertitsinissaanik kajumissaarlugit. ”Faxe Kondi-p nersornaasiuttagaa” Peter Davidsenimut tunniunneqarpoq, Maniitsumi GAME-mi Playmakeritut maligassiuisututlu inissisimaneranut, ukioq mannalu „Piukkunnaatilinnik ineriartortitsinermut“ nersornaat Patrick O. Frederiksenimut tunniunneqarpoq, taanna Kalaallit Nunaanni futsalimik ineriartortitseqataammat.

Naggataatigut Kalaallit Nunaanni Timersoqatigiit Kattuffianni siulittaasoq Claus Nielsen kalaallit erfalasuat tigummiarlugu scenemut iserpoq nillialluni: “Kalaallit Nunaat!” inersuarmi peqataasut nuannaarlutik avaallapput “Ukiumi Timersullammak 2025”-mut nersorneqartoq suaarutigineqarmat. Nersornaat Lissi Ottosenimut, Nuuk Shotokan Karate-Do-meersuusumut, Europami marloriarluni pissartanngortumut, kalaallillu piginnaanillit piumassuseqartullu nunarsuarmi qanoq angusaqarluartigisinnaanerannut assersuutigineqartumut tunniunneqarpoq. Lissip nersorniarneqarnini killitsissutigingaarpaa, nersornaasiinerullu aqaguani suli nuannaarnera malugineqarsinnaavoq.

- Kalaallit Nunaanni Timersoqatigiit Kattuffianniit "Ukiumi timersullammattut" nersornaaserneqarneq tulluusimaarnaqaaq. Katuami, nunatsinni timersortartorpassuarnik nuannaartunartunik avatagerneqarsimalluni, qamuuna attortinnarpoq, Lisa Ottosen oqaluttuarpoq, nangillunilu:

- Nersornaat ukioq kingulleq angusnnut nersualaarinerinnaanngilaq, aammali ilungersorsimanerma, nalunaaquttap-akunneri arlallit sungiusarsimaninnik tapersersorneqarninnillu, sungiusaasunnit, karateklubbimit uinnillu tapersersorneqarnerannik eqqaasitsissutaavoq, oqarpoq.

Lissilli nersornaaserneqarnini kisimiilluni ataqqinaatissatut isiginngilaa, ingerlaannarlu timersoqatigiiffik inuusuttunullu nersornaaserneqarnini aallaavigalugu maligassiusinnaanini neriuutigaa

- Neriuppunga nersornaat tamanna allanik – pingaartumik inuusuttunik – takorluukkaminnik anguniangaqarnissaannik kajumilersitsisinnaassasoq, timersornerullu nuannaalersitsisarnera misigisinnaalissagaat. Nersornaammik tunineqarneq aamma Nuuk Shotokan Karate-Domut nersorinnissutaavoq. Timersoqatigiiffik pitsaalluinnartoq ataqatigiilluangaartoq, Ukiumi Timersullammattut toqqagaasoq oqarpoq.

Tamanut aliikkusersuineq

Nersornaatit kusanartut agguaanneqarneranni isiginnaariat aliikkusersuinernik pitsaalluinnartunik misigisaqartinneqarput. Katuami isiginnaartitsivik nukimmik ulikkaarpoq – 300 kilonik oqimaassusilik tupinnaannartumik kivinneqarluni takutinneqarpoq taekwondomilu unammisitsineq tul pissanganartoq takutinneqarluni, tassani eqqoqqissaarneq nukittunerlu ataqatigiipput. Nipilersortoqarnerani ilaatigut Nina Kreutzmann Jørgensen inersuarmik qiimmaallatsitivoq, sivitsunngitsorlu “Silarsuaq takuiuk” isiginnaartunik ingiorneqarluni atorneqarpoq, tamaanilu nuannaarneq ataatsimoornerlu malunnarput.

Unnuup naalernerani Katuaq nuannaarnermit pissanganartumillu ulikkaarpoq. Nuummi Eqaarsaartartut pississaarlutik, isiginnaartunik qiimmassaasarput ersaattaattarlutillu. Eqaarsaarnerit tamarmik timersuutip qanoq ataatsimoortitsisinnaaneranik, kivitseqataasinnaaneranik inillu qanoq nuannaarnermik ulikkaarsinnaaneranik takutitsisarput – unnuullu naggataa nuannaarluni pissilluni naggaserneqartarpoq, scene inersuarlu ataatsimut kattullutik.