“Kalaallit Nunaat!”
Kalaallit timersortartut ukioq manna Arctic Winter Gamesimi ammaanersiornermi ingerlaaqatigiinnermi taamatut suaartarput.
16-inik ukiulik Randi Zeeb Sigurdsen Ikerasaameersoq sallersaalluni erfalasulisarpoq. Taanna issittormiut pinnguaataannik timersortartuullunilu AWG 2024-mi ingerlanneqarmat two-foot high kick-imi portunerpaamik pissippoq.
Taassuma tunuani timersuutortartut 58-it, ukioq manna Timersoqatigiit Kalaallit Nunaannut ilaasut, ingerlaarput. Isiginnaartunit qiimmattaatigineqarlunilu ersaattaanneqarput.
AWG ukioq manna Canadami Whitehorsemi ingerlanneqassaaq, kalaallillu timersortartut sapaatip akunnerata tulliani issittormiut pinnguaataanni, eqqillit pinnguaataanni, sulorarnermi, nerrivimmi arsaararnermi snowboardernermilu unammissapput. Taamatuttaaq kulturilerisussat Kalaallit Nunaanneersut peqataapput.
Ammaanersiorneq ippassaq unnukkut ingerlanneqarpoq.
„Sumit sanaajugatta“
Timersoqatigiit Kalaallit Nunaata saniatigut timersoqatigiit Alaskameersut, Alberta Northimeersut, Yukonimeersut, Northwest Territoriesimeersut, Nunavummeersut, Nunavik-Quebecimeersut aamma Sapmimeersut peqataapput. Timersoqatigiit arfineq pingasut tamarmik Shipyards Parkimut apuummata ammaanersiorneq oqalugiarnernik, qitinnermik erinarsoqatigiinnillu Canadap inuiattut erinarsuutaanik erinarsortitsinermik aallartinneqarpoq.
Taamatuttaaq Canadap ministeriunera Mark Carney videokkut inuulluaqqusilluni AWG-mi timersortartut tamaasa ingerlalluarnissaannik kissaappai. Ukioq manna qulequtarineqartoq tassaasoq „Sumit sanaajugatta“ eqqaavaa, tamannalu tulluartuusoraa.
Naggataagut qummoroortartoqarpoq, taamaalillunilu ukioq manna Arctic Winter Games aallartippoq.
AWG Yukonimi illoqarfiit pingaarnersaanni Whitehorsemi kingullermik ingerlanneqarmat ukiut 14-it qaangiupput. 2020-mi unammiuaarnerit illoqarfimmi tassani ingerlanneqartussaagaluarput, coronali pissutigalugu taamaatiinnarneqarput. Taamaammat AWG-p Yukonimi ingerlateqqinneqarnera ersarissumik nuannaarutigineqarpoq.
