Ileqqutoqqanit ajugaanermut

Piviusulersaarummi kalaallit timersortartut kiakkiullugu sungiusartarneri, isiginnaaqqissaartarnerat eqqarsaatiginneqqissaartarnerallu malinnaaffigissavavut. Timersuummik aallussinermi timersuut unammissutaannaanngitsoq misigissavarput, aammali kinaassutsimik, kulturimik tulluusimaarnermillu ersersitsisuusoq – taama aallussineq Issittormiut Unammiuaarneranni 2023-mi sakkortunerpaaffimminiippoq, tamatumani Kalaallit peqataatitaat nunani tamalaani ukiuni qulikkaani ileqqutoqqanut tunniusimanerminnik qanorlu angusaqarluartigisinnaanerminnik takutitsisussaallutik. Timersornerit unammillernartorpassuit akornanni erseqqippoq timersorneq aamma imminut nassaarinissatsinnut ataatsimoornermullu inissisimaffitsinnik paasinninnissamut iluaqutaasoq.

 

Timersorneq kulturinngoraangat 

Dene Games aamma Issittormiut Timersuutaat, timersortarnerit qangaaniilli ingerlanneqartartut marluusut, Issittumi kulturimi sorlaqarluartut pillugit piviusulersaarusiaq qaqutigoortumik paasisaqarfiuvoq. Timersortartut sungiusartarnerat, unamminerat timiminnik eqqarsartaatsiminnillu ilungersuatitsinerat malinnaaffigissavavut. Dene Gamesimi takutinneqassapput snow snake, qiterlerminneq, nutsuunneq, orpissuaq aamma assak sorleq, tamakku siornatigut Issittumi silap pissusiani sakkortuumi piniarnermi aniguiniarnermilu atorneqartartut, sulilu nukittussutsimik, eqqarsaatiginneqqissaarnissamik suleqatigiinnermillu pisariaqartitsiffiusartut.

Soorluttaaq Issittormiut Timersuutaanni unammiuaarnernik aamma alutornartunik, soorlu isikkamik ataatsimik illugiinnillu tukerseriaanermik, pakassumminnermik, seeqqorluni siumut pissinnermik, qamutit qulaattarlugit pissittaqattaarnermik aamma niaqoq atorlugu allunaamik nutsoruulluni ajugaaniunnermik, unammisoqartarluni.

Unamminerni tamakkunani tamani eqqorluartumik piffissarlu eqqoqqissaarlugu ingerlatsinermik pingaartitsinertulli pingaaruteqartigipput. Niaqoq atorlugu allunaamik nutsoruulluni ajugaaniunnermi, unammissutigineqartumi suna pineqarnersoq paasigaanni, isiginnaartoq assorooqataalluni aatsangaannalersarpoq niaqunilu anneralugu.

Filmimi piviusulersaarummi timersorneq iluanit misigisassaavoq – oqaatsinik atuakkani nassuiaatissatut pinnagu, kisiannili nipaatsumik tulluusimaarneq timip aalanerini tamani malunnartartoq aqqutigalugu. Timersornermik kulturikkut inuttullu pingaartitsinerup annertuup Dida G. Heilmann piviusulersaarummik Peter Jensen peqatigalugu suliarisaminik suliniuteqarnissaanik aallartitsisippaa.

- Taamani Inuit & Dene Games Nuummi siulersuisuni siulittaasuugama aamma Dene Gamesimi timersortartuugama ataatsimeersuarnermut Arctic Sports Greenlandimit aaqqissuunneqartumut qaaqquneqarpunga. Timersortarnitta qanoq ililluta siuarsarsinnaaneranut isumassarsiaqarnersugut aperaatigut. Ingerlaannalunga eqqarsarpunga filmimik piviusulersaarusiortariaqartugut, Dida G. Heilmann oqaluttuarpoq, taannalu siornatigut piviusulersaarusiornermik suliaqarsimanngilaq.

Tamatuma kinguneraa filmi misigissutsinik ulikkaartoq, tamatumanilu unamminerni timip aalanera tamaat timersuutillu kulturimut attuumassuteqarluinnartut pillugit oqaluttuarnertut isikkoqalerput.

Timersortartumut aalajangersimasumut malinnaaneq

Filmimi aamma timersortarnerup tunuliaqutaatut timersortartoq sammineqarpoq. Filmip aallaqqaasiutaani Steffen Knulst naapipparput, taannalu filmip plakaatitaani aamma takuneqarsinnaalluni. Asannissuseqanngitsumik meeraasimanini, imigassamik ikiaroornartumillu atornerluisuni peroriartorsimanini ilaqutariinnullu assigiinngitsunut inissinneqartarsimanerminik oqaluttuarluni. Timersorneq aqqutigalugu angerlarsimaffivissaminik nassaarpoq, filmimilu malugisinnaavarput qanoq ililluni ileqqorissuuneq timigissartartullu aalaneri inuunermut sunniuteqarsinnaanersut, ataatsimoortitsisinnaallutik inuttullu ineriartornissamut ajugaaniarnissamullu periarfissaqalersitsisinnaanersut. Tamatumani timersorneq unamminerinnaanngilaq ujaminnanniarnerinnaananilu – kinaassutsimik ineriartortitsinermut, ataqatigiinnermut inuunermilu siunertaqarnissamut iluaqutaavoq.

 

Isiginnaartut piviusulersaarusiaq takoreerunikku tamanna paasiumaaraat Dida G. Heilmannip neriuutigaa:

- Isiginnaartut timersorneq ataatsimoornerlu paasissagaat, kulturilu tunuliaqutaasoq malugissagaat neriuutigaara. Eqqaasinneqarluta ataatsimooraangatta qanoq nukittutigisarnersugut, Nunatsinni Issittumilu ataatsimoornerup qanoq pingaaruteqartiginera aamma sumiikkaluaruttaluunniit ikioqatigiittarsinnaanerput ilanngullugu, Dida piviusulersaarummi takutinniarneqartoq ersarissumik takuneqarsinnaasoq pillugu taama oqaluttuarpoq.

Issittormiut Timersuutaat aamma Dene Games pillugit piviusulersaarummi ileqqutoqqat, kulturi ataatsimoornerlu takutinneqarput, timersuutillu tamarmik immikkut inummut unammillertumut takussutissiisarlutik. Filmi aallartinnermisut naavoq - Steffilu ima oqarluni:

- Inuup ilungersuuteqartup kisimi anguniakkani angussavai.

Oqariartuut tamanna tusarnaartuni qamuuna attorneqaataassaaq, tamatumanilu erseqqissarneqarluni timersornerup, kulturip ataatsimoornerullu imminnut ataqatigiilluinnarnerat.