Jakob Larsen, assammik arsartartoq tusaamasaq, Kalaallit Nunaanni arnat nunanut allanut unammisartuisa sungiusaasuattut atorfinitsinneqarpoq.
Sungiusaasoq misilittagaqarluartoq, siornatigut nunanut allanut unammisartunut peqataasarsimasoq, piumassuseqarluarlunilu ilisimasaqarluartuuvoq.
- Jakob Larsen arnanut nunanut allanut unammisartunut sungiusaasussatut naleqquppoq. TAAK maanna ineriartorfioqalunilu aaqqissuussaanikkut nukittorsarneqangaatsiarpoq. Siulersuisut anguniagaat kalaallit assammik arsartarneranni ataatsimut anguniakkatsinnut naapertuulluinnarput – ilaatigut 2027-mi juunimi VM-imut anngunniunnissamut, Carsten Olsen, TAAK-mi siulittaasoq oqarpoq.
Jakobip Danmarkimi Horsens Håndbold Elitemut ilaasortaanera pitsaasumik suleqatigiinnissamut periarfissatsialaavoq. Danmarkimi katersuunnerni suleqatigiinneq kalaallit assammik arsartartut nukittorsarnissaannut nunallu killeqarfii akimorlugit isumassarsisitsisussaavoq.
- Kalaallit assammik arsartarnerannik tapersersuisinnaanerput tulluusimaarutigaarput. Suleqatigiinneq isumassarsisitsisarlunilu nukittorsaataasoq Kalaallit Nunaanni Danmarkimilu assammik arsarnerup ineriartorneranut iluaqutaavoq, Jørgen Møller HH Elitemi siulersuisuni ilaasortaq oqarpoq.
Jacob Larsen aamma nuannaangaarpoq.
- Ukiorpassuarni nunanut allanut unammisartuusimagama maanna tunniussaqarnissannut piffissanngorpoq. TAAK-ip aaqqissuussaanikkut nukittorsarneqarnissaa siulersuisullu anguniagaat uanga nammineq kalaallit assammik arsaattartut sinnerlugit anguniakkannut naapertuulluinnarput. Ataatsimoorluta Kalaallit Nunaata VM-imut annguteqqinnissaanut anguniakkagut angussavagut. Qujamasuppunga HH Elitep immikkuullarissumik periarfissimmanga, peqataasullu tamarmik suleqatigiilluarnissaannut qilanaarpunga.
Jakob Larsenip nunanut allanut unammisartunut sungiusaasunngorneratigut Kalaallit Nunaanni arnat nunanut allanut unammisartut nunani tamalaani iluatsitsilluarnissamut alloriarnissaminnut piareersimapput.
