Aqqalu Lukassenimut ukioq tamani ukiuni allaaneruvoq.
Taassumami ullorsiutai sungiusarnermut tunngasuupput, sapaatip akunneranut tallimariarluni sungiusartarpoq.
- Ullut tamaasa sungiusartarpunga, taamaallaat pingasunngorneq arfininngornerlu eqqissisimaarfigisarpakka.
Sungiusarnerup saniatigut peqqinnartunik proteineqarluartunik nerisaqarluartarpoq, timikkut siuariaatigisaminik.
- Nerisassat eqqortut peqqinnartullu uannut siuariartitsingaatsiarput, Aqqalu Lukassen oqarpoq.
Skotlandimut angalaneq tupaallannartumik angusaqarfiusoq
Ukioq manna piugunaannerpaaq tassaavoq Skotlandimut angalaneq, tassani Worlds Strongest Teenimut unammeqataavoq. Naak unammisassani unamminnginnermi naapissimanngikkaluarlugit ingerlalluarsimaqaaq.
- Naluara taamani qanoq ingerlajumaarnerlunga, kisianni unammissassakka unammineranni isiginnaarakkit paasivara periarfissaqarluarlunga.
Unamminermi pingajuattut inissippoq.
Aqqalu Lukassenip angunni, Lars Lukassen sungiusaasoraa:
- Ataatama tapersersortuaannarpaanga, sungiusaraangamalu ilagisuaannarlunga, Aqqalu Lukassen maanna 16-inik ukioqartoq oqaluttuarpoq.
Aqqalu Lukassenip aappaagu 2025-imi nunanut allanut unammiarnissaminut periarfissarsiorpoq. Suulut Geisler manageriuvoq angalanerillu aaqqissuuttarlugit. Taakku USA-mukarnissaq Skotlandiliaqqinnissarlu pilersaarutigaat.
- Suut unammeriaatsit sungiusarfigissanerlugit paasinikuuara, Aqqalu Lukassen oqarpoq nangillunilu:
- Skotlandimiikkama misilinnikuunngisakka misilippakka, soorlu dødløft takisooq, poorsuit kaattallu. Taakku aappaagumut sungiusarfiginerussavakka.
Nukappiaraq piginnaanilik
Aqqalu Lukassen NU-mi unamminermi tallimariarluni guultinnappoq, Arctic Winter Gamesimilu Alaskami Mat-Sumi unamminermi pingasunik guultinnappoq kiisalu marlunnik bronzennalluni.
Suulut Geisleri Aqqalu Lukassenimut manageriullunilu angalanissamut aaqqissuussisarpoq, taanna aningaasaliisussanik angalanissanillu isumaginnittuuvoq.
- Timersornernut assigiinngitsunut piginnaaneqarpoq. Taakkuali naammanngillat. Angisuumik angusaqarusukkaanni pimoorullugu sulisariaqarpoq. Aqqalup immikkuullarissutigaa pimoorussisuugami angorusutanilu ulapputigalugu, Suulut Geisler Sermitsiamut oqarpoq.
Aqqalu Lukassenip angutaa Kim Ujarallu nunani angalanissamut periarfissanik ujartuipput.
- Periarfissanik misissuivugut, soorlu Strong Man Games allallu USAmi Skotlandimilu pisussat. Aamma inuiattut ullorsiornitsinni Greenlands Strongestimi unammeqataassaaq, Suulut Geisler oqarpoq.
Aqqalu Lukassen aamma Danmarkimi Max Powerimi unamminissamut peqataasussatut qaaqqusaavoq.
