14-inik ukiulik Ronja Wraae Würtz Danmarkimi nalulluni pissartanngorniunnermi kuultinnappoq.
Danmarkimi pissartanngorniuttoqannginnerani naluttartut Reykjavikimukarput Reykjavik International Gamesimi peqataajartorlutik. Ronja Wraae Würtz inuusuttut 50, 100 aamma 200 meterimut butterflymik nalulluni unammineranni kuultinnappoq. Aamma ukioqatigiiaani assigiinngitsuni finalimut annguppoq, tassanilu inersimasunut nalunartunut 200 meterimut butterflymut sølvinnappoq 100 meterimullu bronzennalluni.
Reykjavikkimiit Ronjap kuultinik pingasunik, sølvimik bronzemillu ujaminnappoq.
Nuuk Svømmeklub Kalaallit Nunaat sinnerlugu Reykjavikimi Erfalasorput nalulluni nasani, tujuuluarni taskinilu atorpaat.
Kuultinnanneq siulleq
Ronja Wraae Würtz aamma Ragna Sander Granlien Reykjavikkimiit Danmarksmesterskabimut nalunermik unammiarlutik peqataapput. Ronja 200 meterimut butterflymut DM-imi kuultinnappoq, tassani qallunaat naluttartuinut ukioqamminut unammilluni. Taamaasilluni Ronja Kalaallit Nunaanni naluttartut siullersaallutik DM-imit kuultinnapput.
- Nalunngilarput naluttartuvut sungiusarluarlutillu eqqarsartaatsikkut nukittuujusut, Reykjavikimili taama angusarissaartigisussaalluta DM-imilu kultinnannissarput ilimagisimanngilarput, Ane Wraae Nielsen sungiusaasut sinnerlugit oqarpoq.
Ronjap Island Gamesimut 2027-mi Savalimmiuni pisussamut peqataanissani kajumigilluinnarpaa, naak taamaalioruni maannakkut rekordini 10 sekundinik sivikinnerutittariaqarlugu.
- Siorna Orkneymi Island Gamesimi peqataaneq misigisaavoq nuannerluinnartoq. Qeqertani tamani immikkut ittumik misigisaqarfiuvoq. Nunarput sinnerlugu ujaminnakkusukkama uteqqikkusuppunga, Ronja Wraae Würtz oqarpoq
Ataatsimuussuseqarluarneq
Timersortartut peqatigiiffianni ujaminnanneq sungiusaasut inuusuttullu ilungersornerat nuannaarutigineqarput. Taamatulli pingaaruteqartigaaq sungiusaqatigiinnerit unammiuaarnerillu inuusuttut ataatsimoornerannut iluaqutaasarnerat. Imminnut qiimmassaanermikkut timersornerulernissamut kajumissaaqatigiittarput, aamma inuusuttut namminneq ineriartornertik ikinngutimillu ineriartornerat malugisarpaat.
- Ineriartortitsisimanerput meeqqallu ilikkagarisimasaat angusimasaallu nuannaarutigalugillu tulluusimaarutigaagut, Ane Wraae Nielsen oqarpoq.
Angalaneq Vestnordisk Hovedstadsfondimit, NATA-p Kalaallit Nunaannut aningaasaateqarfianit, Helene aamma Svend Junges Fondimit, Kommuneqarfik Sermersuumit aamma Kalaallit Nunaanni Timersoqatigiit Kattuffianniit tapiissutigineqarnikkut pivoq.
