Ukaleq Slettemark World Cupimi immikkoortumi kingullermi seqqortaartarfimmi peqataasuni sukkanerpaaffigisamini, nutaamik angusassiivoq. Seqqortaarnerni sisamani, tallimariarluni igeriarfiusuni, Ukallip 1 minut 38 sekundiinnaat atorpai – piffissaq imaannaanngitsoq igeriarfimmut tutinerminit qimanneranut piffissaliisartoq. Nikuilluni igeriarnermi 21 sekundiinnaat atorpai- angusaq nunarsuarmi pitsaanerpaanniittutut taaneqartariaqartoq.
Italiamiu tusaamasaq igeriallammallu misilittagartooq Dorothea Wierer, ukiorpassuarni nunarsuarmi kakkannerpaanut ilaasoq Ukalermit 6 sekundinik qaangerneqarpoq. Igeriartartut taakku tamarmik igeriarnernit 20-init 18-t eqqorpaat, timersullammaallu taakku tamatigut uniortarput.
Taamattaaq Ukallip qatanngutaa, Sondre Slettemark, angusaqarluarpoq, naak qatanngummisulli sukkatiginngikkaluarluni. Sondrep sisamariarluni igeriartarnermini 1 minut 54 sekundillu atorpai – angutit 102-t akornanni sukkanerpaani 35-iulluni. Naak kigaannerulaaraluarluni igeriarnernit 20-nit 19-t eqqorpai, taamaalillunilu piffissaq igeriarfik eqquilluarnerlu katikkaani igeriartuni pitsaanerpaanut arfineq pingajuuvoq.
Taakku isiginiaraanni Ukaleq pitsaanerpaat sisamaraat. Arpaffimmi Ukaleq Sondrelu ukioq manna ilungersunartumik allartipput, tamannalu pingaarnertut napparsimanermik sungiusarnerannik killiliisumik patsiseqarpoq. Taamaakkaluartoq Sondre peqataasunit 103-nit normu 56-itut inissippoq – ulloq manna tikillugu World Cupimi angusaani pitsaanerpaaq. Ukaleq arnani 103-ni arpattuni nr. 47-nngorpoq, taannalu World Cupimi angusaasa pitsaanerpaat pingajoraat.
Qatanngutigiit Slettemarkikkut piginnaasaqarluarnertik takutippaat, tamannalu ukioq manna unamminissanut neriullualersitsivoq.
