Tasiilami ataatsimoorfik immikkuullarissoq: Futsalerneq imminut tatiginerulersitsisarpoq

Nuummi timersortarfissuarmi skærmi unammisut isertitaannik takutitsisoq qiviaraanni unammisut 2-3-qqasut takuneqarsinnaavoq. Tasiilarmiut ATA-meersut nukappissat U15-it kinguaqqapput. Kinguaqqaannanngillat, akeravissuarminnummi Kulusumeersunut TM-62-ikkunnut ajorsaqqajaapput.Arsaqatigiit taakku tamarmik Sermersuaq qulaallugu Nuummut Polar El Cuperiarput, bronzennanniunnerallu aallarteruttorluni.

Unamminerup naammassinissaanut minutsit pingasuinnanngortullu Eigil Ignatiussen aqqanilinnik ukiulimmit Eli Kûkomit ikiorluarneqarluni isertitsivoq, unammisullu 3-3-rlutik naligiilerput. Eli Kûko aqqaniliinnarnik ukioqarami U15-it unammiuaarnerannut inuukkaluarpoq, Tasiilamili futsalertartut qanoq immikkuullaritsiginerinut taanna takussutissanut ilaaginnarpoq. Bronzennanniunnerup qanoq inerneqarnera kingusinnerusukkut uterfigiumaarparput.

Futsal pinaveersaartitseqataavoq

Nuummi unamminerup pissanganarluinnartup pinnginnerani nukappissat Tasiilami sungiusarneranni qaammatit marluk matuma siorna naapippagut. Nukappissat sapaatip-akunneranut pingasoriarlutik sungiusartarput. Tasiilami oqaluttuassaqqissut pillugit innuttaasut aperigaangatsigit futsalertartut eqqaallattaaneqartuartarmata paasisaqarfiginerorusullugit sungiusarneranni malinnaavugut. 

42-nik ukiulik Hans Poul Andersen arsaqatigiinnut sungiusaasuuvoq, taanna suliffeqarfiit arsaqattaarneranni ajoqusersimagami tusiakkaluarluni nukappissanik nivissanillu sungiusaaleruttorpoq. Futsalerneq Tasiilami meeqqanut inuusuttunullu pingaaruteqarluinnartoq Hans Poul Andersenip oqaluttuaraa.

- Timersortarfik Tasiilami naapiffissatuat ilagaat, maani meeqqat inuusuttuaqqallu ukiutik apeqqutaatinnagit naapittarput kammagiilertarlutillu. Nivissat nukappissallu qulinit ukiulinniit 15-inut ukiulinnut sungiusaqatigiittarput imminnullu ilinniarlutik.

Ataatsimoornerattaaq ersarippoq.

– Måleraangama isumaqarpunga ilakka qiimmatsittarlugit, 14-inik ukiulik Ingemann Uitsatikitseq oqarpoq.

Hans Poul Andersenip arsartartut målip titarnerata nalaanukaqquai palloqqullugillu. Oqarniariartoq nikuipiloorput målillu illuatungaanut arpariarlutik uterlutik. Arlaleriarlutik uteqattaareerlutik anertikkarlutillu qasorpasipput. Sungiusaasulli taama sungiusaanera pissutissaqarluarpoq.

- Tamatigut sakkortuumik sungiusarlugit qasutinniartarpagut. Sakkortuumik sungiusarsimatillutik ajortuliorniakujunnissaraluaminnit kammalaatitik peqatigalugit eqqissisimaarusunnerusartut maluginiarnikuuarput, Hans Poul Andersen oqarpoq nangillunilu.

- Ukiut misileraaffiusut nalaaniileruttoramik ilaasa pujortarniakujunnerit imerniakujunnerillu nalaattarpaat. Taamaammat pinaveersaartitsineq pingaaruteqarpoq. Pinaveersaartitsinerlu peqatigiiffitsinni ukkatarisatsinnut ilaavoq.

Angalanerit imminut tatiginerulersitsisut

Nuummi Inussivimmi pissanganersuaqarpoq. Tasiilarmiut Kulusummeersullu unamminerminni naligiillutik 3-3-qqapput. Unamminerup naammassinissaanut minutsit marluinnanngormata tamaviaaqalutik sukataarput. Arsaqatigiit nukarlersaat Eli Kûko arsaattartutoqqatut saassussivoq, iluatsivillugulu isertitsigami ilini 4-3-mik siuartippai. Iligiit sungiusaasoqatigiillu isertitsimmat nuannateqaat, isertitseqqammiinnartormi dommeri siggarpoq unamminerlu naammassilluni. Sunaana taama oqiliallannartigisoq.

Illoqarfissuarmut sapaatip-akunnerani arsinneq naggaserneqarluarpoq. Naak Nuummut unammiarnermi angusaqarluaraluarlutik Nuummiinnerat imminermini misigisaasoq immikkuullarissoq Hans Poul Andersen oqaluttuarpoq.

- Nuummukarnerinnaq nukappissanut imminermini misigisarujussuuvoq, kammalaatitaartorpummi. Arlaleriarluta naluttarfimmiippugut, aamma nuannaartorisaat B67-imeersut Young Gunsikkullu arsartut isiginnaariarpagut. Neriniartarfinni alutoreqisaanni nerisaqattaarpugut. Timersuutaarniarfinnut aamma iserpugut, timersuutaarniarfinnut iseriaannaasannginnatta alutorsaqaat, sungiusaasoq oqarpoq.

Nukappissat Tasiilami qaammatit marluk matuma siorna naapikkatsigit sungiusaasup eqqaasai qilanaarisaannut ilaalluinnarput.

Nuummukarnissassinnut suut qilanaarinerpaavisigit?

– Arsarneq, unammineq pisiniarfiillu, 14-inik ukiulik Keld Sørensen nangaarianngiivilluni taama akivoq.

Nuummi takusat nutaat saniatigut nukappissat arsaqatigiinnut allanut unamminermikkut alutornartunillu takusaqarnermikkut inuttut ineriartupallannerat maluginiartarlugu Hans Poul Andersen oqaluttuarpoq.

- Nuummiinnerminni imminnut tatiginerulersut takusinnaavarput. Timersortarfinni isiginnaartoqarlutik unammineq sungiusimanngilaat, taamaammat taannaannarluunniit ilaannut killissamik qaangiineruvoq. Arsartutta ilaat semifinalinnginnerminni pissanganermik merianngunngikkunik meriarput, nippaarissunilli isiginnaartoqarluni unammineq sungiutipallakkamikku bronzennanniukkatta arsarluaqaat.

Angalaneq akisooq

Nuummut arsinneq iluatsilluaraluartoq suli anguniagaqarusupput. Ilulissani NP-rnissaq piffissami uani arsaaffiusumi angorusutaasa annersaannut ilaavoq. Angusarissaarnerup kingorna nukappissat nuannisarlutillu Nuummut naammatsissimanngikkaluartut Ilulissanut NP-riarnissaq imaaliallaannagassaanngilaq.

- Angalanerup akisunerujussua NP-riarnissatsinnut aporfiit annersaraat. Peqatigiiffipput tapersersuisorujussuuvoq, kisianni kitaani illoqarfiit akornanni angalaneq akikinneroqaaq. Neriuppunga aningaasaliisunik iluatsitsinitsigut kommunillu ikiuunneratigut akissagut naammatsissinnaassallutigit, Hans Poul Andersen oqarpoq.