Angutinnguaq Hegelund-Tittussen, Elite Sport Greenlandimi siulittaasoq aamma Carsten Olsen, Timersoqatigiiffiit Assammik Arsartartut Kattuffianni siulittaasoq ukiuni pingasuni suleqatigiinnissamut isumaqatigiissuteqarput. Kalaallit Nunaanni assammik arsarnermi ineriartortitsineq 2028-p tungaanut nukittorsarniarnissaa siunniunneqarpoq.
Isumaqatigiissummi ilaatigut qaffasissumik timersortartut piukkunnaatillillu aamma nunanut allanut unammisartut sungiusaasuisa piginnaasaannik ineriartortitsinissaq anguniarneqarpoq.
Nunanut allanut unammisartut ataqatigiinnerulernissaat, amerlanerusunik katersuutsinneqartalernissaat ataavartumillu aalajangersimasumik anguniagassartalimmik unammiuaartoqartarnissaa siunertaavoq.
Piukkunnaatilinnik ineriartortitsinissaq, inuusuttut arsartartut inersimasunngortinnatik nunani tamalaani misilittagaqarnerusinnaanissaat anguniarlugu, isumaqatigiissummi pingaarnertut sammineqarpoq. Sammisaqarnerulernikkut sungiusaanermilu avatangiisit anguniagaqarnerusut aqqutigalugit, inuusuttunit pikkorinnernut ingerlaarfik ersarissoq qulakkeerumallugu. Aamma isumaqatigiissummi sungiusaasut ineriartortinneqarnerat sammineqassaaq, tassani nunanut allanut unammisartunut sungiusaasut nunani tamalaani akuersissummik pisariaqartumik piginnaaneqalernissaat qulakkeerniarneqarluni.
Angutinnguaq Hegelund-Tittussenip suleqatigiinnerup tunngavia pitsaasoq oqaatigaa:
- Suleqatigiinnissamut isumaqatigiissut atsiorneqarnerani pingaartissimavarput kattuffiup ukiuni arlalinnut periusissiorsimanerat, tassani ukkatarisat ilagalugu qaffasissumi timersornerup nukittorsaavigineqarnissaa ineriartortinneqarnissaalu. Taakku saniatigut kattuffik anguniagaqarpoq piukkunnaatilinnik ineriartortitsinermik, aammalu nunanut allanut unammisartutut ataavartumik ineriartortinneqarnissaannut. Aammattaaq takusinnaavarput nunanut allanut unammisartunut sungiusaasunik piginnaasanik ineriartortitsinissamut pilersaaruteqartut, kiisalu nunat allat akornanni suleqatigiinnerup nukittorsarneqarnissaa. Tamanna Kalaallit Nunaanni assammik arsarnerup ineriartortinneqarneranut tunngaviuvoq, Elite Sport Greenlandimit aamma Timersoqatigiiffiit Assammik Arsartartut Kattuffiannit tusagassiuutitigut nalunaarummi oqarpoq.
Carsten Olsenip isumaqatigiissut anguniagaqarfiusutut pisariaqartutullu taavaa:
- Elite Sport Greenlandip isumaqatigiissutaa pingaarutilerujussuuvoq Kalaallit Nunaanni assammik arsarnerup ineriartortinnissaa eqqarsaatigalugu. TAAK-mi nuannaarutigaarput Elite Sport Greenlandip periusissiatta anguniakkattalu naapertuuttutut nalilerneqarnera, 2025-ip aallartinnerani saqqummiunnikuusatsinnik. Isumaqatigiissummut tunngaviuvoq ukiuni tulliuttuni qaffasissumi timersornerup aamma piukkunnaatilinnut tunngasut qaffassarneqarnissaat. Aammattaaq ataatsimoorluta Kalaallit Nunaanni qaffasissumi timersornerup pitsaanerusunik sinaakkutaqarnissaa paaseqatigiiffigivarput, tamannalu politikkikkut aalajangiiffigineqartariaqartoq, nunat tamalaat unammillersinnaassutsikkut tulluarsagaasumik unammillersinnaassagutta, aammalu Kalaallit Nunaat timersornikkut pitsaanerusumik nukittunerusumillu inissisimassappat, Carsten tusagassiuutitigut nalunaarummi tamatumani oqarpoq.
Isumaqatigiissut aqqutigalugu illuatungeriit ukiuni tulliuttuni ataatsimut siunnerfeqarput, kalaallit assammik arsartartut pikkorinnerulernissaat nunanilu tamalaani unammisalernissamut periarfissaqarnerulernissaat tassani anguniagarineqarpoq.
