2025-mi aatsaat taama aningaasarsiortigisimasut

- Kilisaataatitta Svend C-p avaleraasartuut 2024-mut sanilliullugit marloriaatingajammik amerlanerusut 2025-mi pisarimmagit, 2025-mi angusarissaarnitsinnut pissutaanerpaavoq, aamma avaleraasartuut 2025-mi akigissaartinneqarmata. 

Ilaqutariinnit pigineqartumi Sikuaq Trawl A/S-imi pisortaq piginneqataasullu pingaarnersaat, Carl Christensen Sermitsiamut taama oqarpoq. 

Akileraarutit ilanngaatigereerlugit siorna 78 millionit koruuninik sinneqartooruteqarnermigut, ukiup siuliani 39 millionit koruuningajannik sinneqartooruteqareerluni, Sikuaq Trawl 2025-mi aatsaat taama angusarissaartigaaq. Kilisaataatileqatigiiffik taamaalilluni 2025-mi angusarissaarnerpaavoq. Ingerlatseqatigiiffik siorna aatsaat taama iluanaaruteqartigaaq.

Kilisaataatileqatigiiffiup kaaviiaartitai 2024-mi 282 millionit koruuniusimasut 2025-mi 349 millionit koruuningajannut amerleriarput.

Ukioq immikkorluinnaq ittoq

Avaleraasartuut akii aatsaat taama qaffasitsigisut, ingerlatseqatigiiffimmut isertitaqarluarfiusut, 2025-mi angusarissaarnermut pissutaaqataasorujussuupput, tassa akileraarutit ilanngaatigereerlugit 78 millionit koruuninik sinneqartooruteqartoqarmat.

- 2025 taamaalilluni ukiuuvoq immikkorluinnaq ittoq, taamalu pisoqaqqissinnaanera ilimanaateqarani, Carl Christensen oqarpoq.

Avaleraasartoorniarneq siorna immikkut ittumik iluatsilluarpoq, Sikuaq Trawlimmi pisassiissutit tamakkersinnaasimavai, ukiumullu siulianut naleqqiullugu marloriaatingajammik akisunerusumik tunineqarlutik. 

Aalisarnermik inuussutissarsiuteqarneq allanngorartuartuusoq pisortap erseqqissarpaa, taamaattumillu suliffeqarfittut pissutsinut nutaanut naleqqussarnissamut piareersimasoqartuartariaqarluni.

- Aalisarnermut inatsit nutaaq, raajartassiissutit ukiuni arlalinni ikiliartornerat avaleraasartoortassiissutillu 2026-mi affaannanngornissaat pissutigalugit, ingerlatseqatigiit naleqqussartariaqarput. 

- Taamaattumik 2026-mi kilisaataatitsinni marlunni fabrikinik naleqqussaaniarluta aalajangerpugut, siunissami unammillernartunut piareersimanerulerniassammata, Carl Christensen oqaluttuarpoq.  

Saniatigut ingerlatseqatigiimmi angusat ikinnerusut

 

Sikuaq Trawl A/S-imi piginneqataallunilu pisortaanermi saniatigut aamma saniatigut ingerlatseqatigiinni Niisa Trawl ApS-imi piginneqataallunilu siulersuisuni ilaasortaavoq.

Niisa Trawlip kaaviiaartitai akileraarutillu ilanngaatigereerlugit angusai apparialaarput. Ingerlatseqatigiiffik siorna 166 millionit koruunit missaannik kaaviiaartitaqarpoq, ukiup siuliani 220 millionit koruuningajaallutik. Sinneqartoorutit aamma appariarput. 2025-mi akileraarutit ilanngaatigereerlugit 20,3 millionit koruuninik sinneqartoorpoq, 2024-mi 34 millionit koruuninik sinneqartoorsimalluni.

Niisa Trawl 2025-mi ukiut siulii assigalugit kilisaammik Regina C-mik Nunatta imartaani raajarniarpoq. Ingerlatseqatigiiffiup kaaviiaartitai ukioq manna 170 aamma 185 millionit koruunit akornanniissasut naatsorsuutigineqarpoq, akileraarutillu ilanngaatigereerlugit 21 aamma 25 millionit koruunit akornanni sinneqartoornissaq naatsorsuutigineqarluni.

Svend C Tunumi saarullinnialersoq

Sikuaq Trawlip kilisaataataa Svend C maannakkorpiaq Skagenimiippoq saarullinniarnissaminut atortulersorneqarluni. Qaammatip ingerlanerani Tunumi Dohn Bankemi saarullinniarluni aallartinnissaa pilersaarutaavoq.

Sikuaq Trawl Kitaani ukioq manna 4.930 tonsinik raajartassaqarpoq, taakkunannga 3.100 tonsit missaat kilisaatip pisarereersimallugit. Sikuaq Trawl aammattaaq Tunup avataani 2.256 tonsinik saarullittassiissutaateqarpoq aamma 1.200 tonsinik suluppaagartassiissutaateqarluni. Tamakku saniatigut nunat tamalaat imartaani 3.890 tonsinik avaleraasartoortassinneqarluni.

Ingerlatseqatigiiffiup ukioq manna 250 aamma 275 millionit koruunit akornanni kaaviiaartitaqarnissani kiisalu 30 aamma 35 millionit koruunit akornanni sinneqartooruteqarnissani naatsorsuutigaa. 

Naatsorsuutigineqartunut tunngavigineqarlutik, ingerlatseqatigiiffimmut ukioq manna raajartassiissutit siornamut sanilliullugit 3.000 tonsinik ikinnerunerat, uumassusilerisullu avaleraasartoortassiissutinut ukioq manna siunnersuutaat 2025-mut naleqqiullugit ikinnerujussuunerat, naatsorsuutigineqartunut tunngaviuvoq. Sikuaq Trawlilli, avaleraasartuut raajallu akiisa qaffariaateqalaarnissaat naatsorsuutigaa.