Suliassaq ersarippoq: Ukiup qaangiuppat ataatsimiititaliaq nalunaarusiussaaq, tassungalu atatillugu paasiuminarnerulersissallugu, suna pisariaqartoq, Kalaallit Nunaat ullut ilaanni namminersulerniarpat.
Isumalioqatigiissitami eqqartuussissuserisoq professoritullu atorfeqarsimasoq Ole Spiermann aamma professori soraarneq Gudmundur Alfredsson naligiissutut ilaasortaalerput. Marluullutik Kalaallit Nunaanni Namminersorneq pillugu Inatsisip ilusilersorneqarneranut suleqataanikuupput, taamaammallu §21 ilisimasaqarfigilluarlugu. Ph.d-inngorniarluni ilisimatusartoq Hans Peder Kirkegaard aamma Namminersorlutik Oqartussani inatsisileriffimmi pisortaq Stefan Krehbiel aamma ilaasortaqatigaat.
Ole Spiermann suliaq annertullunilu pingaaruteqartoq oqarpoq.
- Isumalioqatigiissitaq imaannaanngitsunik suliakkerneqarpoq, suliaqarfigilernissaannullu qilanaarpugut. Kalaallit Nunaata siunissaanut pingaaruteqartussanik inatsisilerinermik suliaqaqqinnissarput tanngassimaarutigaarput, Naalakkersuisut tusagassiuutitigut nalunaaruutaanni oqarpoq.
Politikkiunngitsoq – piginnaasat aallaavigalugit
Isumalioqatigiissitap politikkimut attuumassuteqannginnera erseqqissassallugu pingaaruteqarpoq. Suliaq piginnaasat aallaavigalugit politikkilu tunuliaqutarinagu ingerlanneqassasoq Inatsisartut kissaatigaat.
Naalakkersuisut oktobarimi 2025-mi isumalioqatigiissitap pilersinneqarnissaa akueraat, suliamullu 2 millionit koruuninik immikkoortitsillutik. Pisariaqartitsisoqalissappalli immikkut ilisimasalinnik ikiorneqarsinnaaneq aamma periarfissaavoq.
Inatsit tunngaviusussamut immikkoortortaqarfik, Naalakkersuisut siulittaasoqarfiata ataaniittoq, § 21-Isumalioqatigiissitamut allatseqarfiussaaq.
Maanna suliaq aallartippoq, Kalaallit Nunaallu namminiilivinniarluni aalajangerpat qanoq iliortoqartariaqarnera ukioq ataaseq qaangiuppat ilisimasaqarfiginerulersimassagunarparput.
