USA-p præsidentiata Donald Trumpip Kalaallit Nunaannut immikkut aallartitaa Jeff Landry, Louisianami guvernøri, ataatsimeersuarnermi Future Greenlandimi Nuummi maajip 19-iani 20-anilu pisussamut peqataassaaq.
Suna siunertarineraa paasiniarnissaa soqutiginartorujussuussaaq.
Tusagassiorfik Sermitsiami aaqqissuisuuneq pisortaanerlu Masaana Egede taama oqarpoq:
- Suna siunertaralugu peqataaniarnersoq paasinissaa pissanganarpoq. Ataqqeqatigiilluni aqqutillu eqqortut atorlugit oqaloqatigiittarnissamik kissaateqarneq malinneqarpasileraluarami. Tikeraarnissaa tassunga innarliisinnaavoq.
Nunanut allanut tunngasunut naalakkersuisuunikup Vivian Motzfeldtip qallunaallu nunanut allanut tunngasunut ministeriata Lars Løkke Rasmussenip USA-p nunanut allanut tunngasunut ministeria Marco Rubio præsidentillu tullia J.D. Vance Washingtonimi januaarimi ataatsimeeqatigereeraallu, nunat pingasut akornanni aaqqiagiinnginneq qaangerniarlugu suleqatigiissitanik atorfilittanik inuttaqartumik pilersitsisoqarpoq.
Akerleriinneq Trumpip Kalaallit Nunaannik aqutsinissamik kissaateqarluni arlaleriarluni oqaatigisareeraalu piulerpoq.
Piareersarluarnissamut takussutissaq
Guvernøri qaaqquneqarsimanngitsoq Sulisitsisut Sermitsiamut erseqqissaatigaat. Taamaammat ataatsimeersuarnermut akiliilluni nalinginnaasumik peqataasutut isigineqarpoqq
Tamanna Masaana Egedep eqqarsarnartoqartippaa.
- Nalinginnaasutut peqataassaaq, arlalitsigullu eqqumiiginarsinnaalluni. Qanorluunniit pisoqaraluarpat nammineq tikeraarnertut isigineqarsinnaanngilluinnarpoq, Kalaallit Nunaat pillugumi siunertaqarluni Trumpimit immikkut aallartitaavoq.
Amerikamiut Kalaallit Nunaannut tikeraartillugit, Trumpilluunniit oqaaseqarnera pissutigalugit tusagassiuutitigut ukiuni kingullerni sammineqartorujussuusarpoq, Kalaallit Nunaallu malinnaavigeqqissaarneqalertarluni. Tamannalu piareersimaffigiinnarsinnaagipput Sermitsiami aaqqissuisuuneq oqarpoq.
- Piareersarluarnissatsinnut takussutissaaginnarpoq, oqarpoq
Donald Trumpip Kalaallit Nunaannut immikkut aallartitaata saniatigut USA-p Kunngeqarfimmi aallartitaa Ken Howery Future Greenlandimi aamma peqataassaaq.
