Akunnerit arfineq-pingasut sulineq. Akunnerit arfineq-pingasut sunngiffimmi sammisaqarneq isumagisassanillu suliaqarneq. Akunnerit arfineq-pingasut sininneq qasuersaarnerlu. Ulloq unnuarlu ataaseq taama atorneqartartutut naatsorsorneqartarpoq.
Akunnerilli sulinermut atorneqartartut ikilissappat? Tamanna Naalakkersuisut maanna nalunaarusiornermikkut misissortussanngorpaat.
Inatsisartunut ilaasortap, Karen Marie Kyed Frederiksenip (D), piffissap suliffiusartup sapaatit akunneranut nalunaaquttap akunnerinit 40-nit sapaatip akunneranut nalunaaquttap akunnerinut 35-nut 37-nulluunniit appartinneqarnerata aningaasaqarnikkut, inuiaqatigiinnut peqqissutsimullu kingunerisassaanik misissuisoqassasoq siunnersuutigaa.
Suliffeqarnermut naalakkersuisup, Maritha Brobergip (A), siunnersuummut tassunga allannguutissatut siunnersuuteqarluni misissuinertik naligiissitaanermut tunngasunik aamma imaqassasoq siunnersuutigaa. Siunnersuut tamanna Inatsisartuni amerlanerussutillit akueraat. Nalunaarusiaq Inatsisartunut ilaasortanut 2027-p naanerani agguaanneqassasoq, Naalakkersuisup aamma neriorsuutigaa.
Feriarnermut inatsit allanngoqqaartariaqartoq
Pisortaqarfinni sulilluni sapaatit akunnerinut sulinikinnerulernissaq piviusunngussappat feriarnermut inatsit allanngoqqaartariaqassasoq, aningaasaqarnermut akileraartarnermullu naalakkersuisoqarfik inuussutissarsiornermut aatsitassanullu ataatsimiititaliamut ilisimatitsivoq.
- Piffissaq suliffik, feriarneq pillugu inatsimmi, sapaatip akunneranut ataatsimut 40 tiiminut aalajangerneqartoq allaqqavoq.
- Suliffiup allanngortinneqarnissaanut siullertut feriarnermut inatsisip aaqqissuuteqqinneqarnissaanut attuumassuteqassasoq naalakkersuisoqarfik tassunga atatillugu ilisimatitsivoq, ataatsimiititaliap aappassaaneerinninnissamut isumaliutissiissutaani allaqqavoq.
INI A/S misiliisoq
Sapaatit akunnerinut nalunaaquttap akunnerinit 40-init sivikinnerusumik sulineq misilerarneqarnikuunanilu misissorneqarnikuunnngitsoq, isumaliutissiissummi aamma allaqqavoq.
Inatsisartunulli ilaasortap, Erik Jensenip sammisaq pillugu aappassaanerinnilluni oqallittoqarnerani eqqaasaanut ilaavoq, nammineq atorfeqarfimmini tassani, INI A/S-imi, sapaatit akunneranut akunnerit 37-it suliffigisaritsik.
INI A/S-ip Facebookkimi quppernermini 2025-imi nalunaarutigaa, inissiat pillugit allaffissuussisarfiup sapaatit akunnerinut nalunaaquttap akunnerini 37-ini sulisarneq siorna misileraraa. Ingerlatseqatigiiffillu naapertorlugu misileraaneq suliffeqarfiup sulisuinit iluarisimaarneqarpoq.
