Aleqa Vivianip tunuarnera pillugu: Tusaatissatut tiguarput

Siullermik Siumut naalakkersuisoqatigiinnit tallimanngormat anivoq, Vivian Motzfeldtilu taamaalilluni nunanut allanut naalakkersuisuujunnaarluni.

Naalakkersuisuujunnaarnerminit ullut sisamat qaangiuttullu politikkimi sulileramili partiimit ilaasortaaffigisaminit aninini ullumi marlunngornermi nalunaarutigaa. 

Vivian Motzfeldtip tunuarnera Siumup siulittaasuata tusaatissatut tiguaa.

- Inuttut aalajangernera ataqqivarput. Soorunami ugguarpugut tassunga killittoqartariaqarneranik. Siulersuisuunerit immikkoortortaqarfiillu amerlanerpaat aalajangigaat isumaqatiginagu, aammalu periuserineqartoq taakkunani tamani isumaqataaffiginagu taamannak aalajangernera tusaatissatut tiguinnarsinnaavarput. Ajunnginnerpaamillu kissaapparput suleriaqqinnissaani, Aleqa Hammond taama oqarpoq. 

- Naalakkersuisoqatigiinnit tunualersugut tamarmik ilisimavaat 

Vivian Motzfeldtip Siumumi aninermini partii qimatani sakkortuumik isornartorsiorlugu Sermitsiamut ilaatigut ima oqaaseqarpoq. 

- Suliakka pisariaqanngitsut Siumup aalajangerpaa, Siumuttaaq Inatsisartut siulittaasuattut atorfik Siumumut pisariaqanngitsoq aamma aalajangerpoq. Suliani taakkunani inuit pineqartut peqataatinnagit uagullu suliamik suliaqartugut tusarnaarnata tamanna pivoq, Vivian Motzfeldt Sermitsiamut taama oqarpoq. 

Isornartorsiutaa Siumumi siulittaasumut akissutissarsiniarparput. 

Taanna isornartorsiutaa qanoq oqaasertalersinnaaviuk? 

- Tunngavilersuutigisagut tamaasa tamarmik ilisimavaat, aamma naalakkersuisoqatigiinnit tunualersugut aamma tamarmik ilisimavaat. Aalajangereernerata kingorna saqitsaassutiginiarsarissanngilara kina qanoq pinersoq. Tusaatissatut tiguinnarsinnaavarput aalajangernera, Aleqa Hammond oqarpoq. 

Qinikkat peqataatissimasinnaannginnassigit aalajangernermi taamaattumi?

- Siornatigut Siumut siuttuuffigineqarmat - aamma uanga nammineq taarsernikuuara siulittaasutut - immikkoortortaqarfiit peqataatinneqartarnikuunngillat. Maannakkut iluarineqarpoq tamarmik peqataatinneqaramik, taamaammat suleriuseq nammineq suleriusimininngaannit allaanerusoq ippigivaa, aamma paasisinnaavarput. Inuit ataasiakkaat issiavii tigummiinnarniarlugit naalakkersuisoqataaginnarniarneq nalilersuutaasimavoq annertoorujussuarmik Siumumi, Aleqa Hammond oqarpoq.  

Siumut mattutinngilaq 

Siumup naalakkersuisoqatigiinni aninermini sunniuteqaqataasinnaanermini imminut mattuttoq Vivian Motzfeldtip Siumumi aninermini ilaatigut isornartorsiutigaa, tamannalu peqataaffigisinnaajunnaarnerarlugu. 

Siumut naalakkersuisoqatigiinnit aninermini imminut mattutinngitsoq partiip siulittaasua isumaqarpoq. 

Nunatta inissisimanera eqqarsaatigissagaanni naalakkersuisooqataanermi  sunniuteqaqataasinnaavusi, massakkut aninersi eqqarsaatigissagaanni immissinnut mattutinngilasi? 

 - Nunarput naalakkersuinikkut imminut mattutinngisaannarpoq. Inuit ataasiakkaaniinngimmat nunatta politikkia, kisiannili partiit assigiinngitsuniilluni,  aammalu avammut ataatsimut nipeqarnissatsinniilluni. Nunatta avammut suliniarneranut tunngatillugu Siumut naatsorsuutigineqartuaannarpoq, Aleqa Hammond oqarpoq. 

Arlallit isumaqataanngillat - partiili ataatsimoorpoq  

Vivian Motzfedtip Siumumit aninini nalunaarutigereeraalu Siumutoqqap, ukiunilu 41-ni Siumuusimasup, Kim Kielsenip partiimit aninini nalunaarutigaa. Taamaalilluni Siumut sinnerlugu Inatsisartunut kingullermik qinersinermi ilaasortanngortut sisamaasut affaat Siumumit anipput. 

Partiili ataatsimoorluni inissisimasoq siulittaasup, Kim Kielsenip aninerminik nalunaarnini saqqummiutinngitsiaraa, erseqqissarpaa. 

- Inuup ataatsip aalajangersimanera pillugu isumaqanngilaq Siumut katersorsimanngitsoq. Eqqaasitsissutigissavara Siumup siulersuisuuneri tamarmiusut, aammalu immikkoortortaqarfiit tamarmik, marluk pinnagit, aalajangernermut tunuliaqutaapput, Aleqa Hammond naggasiivoq.