Kalaallit meerartaasa angerlassimaffiup avataanut inissinneqarnissaannut suliani nalilersueriaatsit "inuiannik immikkoortitsnerusinnaasoq" Naalagaaffiit Peqatigiit isumaqarput.
Taama allappoq aviisi The Guardian.
Naalagaaffiit Peqatigiinni atorfillit pingasut qallunaat naalakkersuisuinut allakkatigut saaffiginnillutik ilaqutariit kalaallit qanoq pineqarsimanerannut apeqqutinik arlalinnik nassiussipput.
"Inuit pisinnaatitaaffii unioqquteqarsimasinnaasut" tunngavissaqarsoralugu taakku allapput.
Angajoqqaat qitornaasa angerlarsimaffiup avataanut inissinneqarnissaannut suliani nalilersueriaatsit - FKU-mik taaguutillit - pineqarput. Aamma angajoqqaanut kalaallinit kingoqqisunut.
Nalilersueriaatsit kalaallit oqaasiinut kulturiannullu tulluarsarneqarnikuunnginnerat isornartorsiorneqartorujussuuvoq, tamannalu angajoqqaat kukkusumik meeqqaminnik arsaagaanerannik kinguneqarsinnaaneranik aamma pissuteqarsinnaalluni.
Isornortorsiorneqangaatsiareersorlu kalaallinut angajoqqaanut nalilersuutit taakku atorunnaarsinneqarput.
Reem Alsalem, Naalagaaffiit Peqatigiinnit arnanut niviarsiaqqanullu nakuuserneq pillugu immikkut nalunaarusiortoq, aamma nunap inoqqaavi pillugit immikkut nalunaarusiortoq kiisalu ammip qalipaataa tunngavigalugu immikkoortitsisoqartarneranut immikkut nalunaarusiortoq allakkanik taakkuninnga nassitsisuusut, The Guardian allappoq.
Taarsiivigineqarsinnaasariaqartut
Allakkat apriilip naanerani nassiunneqarput.
- Nalilersueriaatsit taamaattut siunissami kalaallinut angajoqqaanut atorneqartarunnaarnissaannik aalajangerneq nuannaarutigaarput, FKU-llu atorlugit nalilersorneqarlutik aalajangiiffigineqarsimasut naapertuilluartumik pineqarlutillu taarsiiffigineqarsinnaasariaqarput, Naalagaaffiit Peqatigiinni atorfilittat aviisi naapertorlugu allapput.
Keira Alexandra Kronvoldimut Thistedimeersumut suliaq eqqaaneqarpoq.
Atorfilittat "ukiut ingerlaneranni kinguaassiorsinnaanerput naartunaveersaatillu pillugit aalajangersimasaanik ataqqinninngittoqarnera erseqqissoq" tikkuaraat, aviisi allappoq.
Alsalem Kronvoldip eqqartuunneqarnissaa malinnaaffiginiarlugu, qanorlu iliuuseqassanerluni aalajangertinnani danskit oqartussaasuisa qanoq qisuariarnerat takoqqaarusullugu oqartoq, The Guardian allappoq.
