Nuummi inissiat akii 2022 tikillugu qaffakkiartuinnarsimapput. Ukiuni kingullerni pingasuni inissianik tuniniaanermi pisut allanngorluinnarput, inissianillu tuniniaaneq sivisunerujussuanngortarpoq.
2022-mi inigisamik tuniniaaneq agguaqatigiissillugu ulluni 75-ini pisarpoq. 2025-mili kvartalit pingajuanni erniat qaffakkiartorput, piffissarlu tuniniaanermi atorneqartoq ullut 300-t angullugit amerlassuseqarlutik, Grønlandsbankenip 2025-mut ukiumoortumik nalunaarusiaani misissuinerup takutippaa.
Inissiat akii erniat qaffasissusaanik inissiallu qanoq amerlatiginerinit sunnerneqartarput, ukiunilu kingullerni sanaartorfiunerusuni amerlasoorpassuarnik inissialiortoqartarpoq.
- Piffissami tamatumani kvadratmeterimut agguaqatigiissillugu aki 31.000 koruunit missaannik naleqarpoq. Inuiaqatigiinni nalinginnaasumik akit ineriartornerat eqqarsaatigalugu tamanna inissiat akiinik appariarujussuarnermik kinguneqarpoq. 2025-mi akit COVID-19-ip nunarsuarmi tuniluunnerata siornarnit appasinnerupput, Grønlandsbanken misissueqqissaarnermini allappoq.
Aalajangiisoq
Ineqarnermut akiliutit qaffakkiartornerannut aalajangiisoq tassaavoq “2022-mi taarsigassarsiat erniaasa qaffannerat ukiunilu tulliuttuni qaffasinnerusumik inissisimanerat”.
- Tamanna aamma inissianik tunisineq annikitsuinnarmik appariarsimanerani takuneqarsinnaavoq, agguaqatigiissilluguli inissiat tunineqartut siulianut sanilliulllugu annikilleriarsimapput, misissuinermi allassimavoq.
Illoqarfiit pingaarnersaanni illuuteqareersunut nutaarsiassatsialaagallarpoq, aningaaserivik naliliivoq, imalu allalluni:
- Akit appariartornerat pissutigalugu piffissami aggersumi pisisartut amerlanerulernissaat ilimanarpoq.
Inissialiornerit arlallit maanna naammassineqarsimalereernerat, taamaammallu neqerooruteqartoqarpallaarunnaarnera inissianik piginnittunut nutaarsiassatsialaateqarneranut pissutaavoq.
- Tamanna tuniniaanerit uninngasarnerannut akinut nalimmassarnermut iluaqutaassaaq, Grønlandsbanken naliliivoq, erseqqissarpaalli pissutsit arlallit assigiinngitsunik sunniuteqarsinnaasut:
Ineriartorneq annikitsoq apparsaataasinnaasoq
- Ukiunili tulliuttuni inissianik tuniniaanerup siunissaa neqeroorutigineqartut kisiisa aallaavigalugit aalajangiiffigineqarsinnaanngillat. Inissianik tuniniaanermut piumasaqarnerit aningaasaqarnerup ineriartorneranut attuumassuteqarnerattulli pingaaruteqartigaaq. Aningaasatigut siuariartorneq erniat apparnerisigut isertitallu killilimmik qaffakkiartorpata, tamanna niuernermut sunniuteqarsinnaavoq.
Nuummi init akiisa ineriartornerat Københavnimut Torshavnimullu sanilliukkaannni assigiinngissutaat annertuvoq, soorlu takussutissami takuneqarsinnaasoq. Københavnimi Torshavnimilu ineqarnermut akit 2024-mi aamma 2025-mi qaffakkiartorput, Nuummiut pinnatik killormuuanik ingerlasoqartoq.
