Qeqqata Kommuniani kommunalbestyrelsimi isumaqatigiinngittoqalerpoq.
Borgmesterip tulliata siulliup Gideon Lyberthip suleqatigiinni ilaajunnaarluni illuatungiliuttut partiivi isumaqatigiissuteqarfigai.
Kommunimi borgmesteri Malik Berthelsen (S) Siumumit Inuit Ataqatigiinnillu suleqatigiinni siuttuuvoq.
Maannamut partiit taakku marluk arfineq-pingasunik ilaasortaatitaqarlutik amerlanerussuteqartut illuatungiliuttut arfineq-marlunnik ilaasortaatitaqarput.
Gideon Lyberthip suleqatigiinni ilaasortaajunnaarnera pissutigalugu Malik Berthelsenip ukiuni pingasuni borgmesteritut sulinissaa ajornakusoornerusinnaavoq.
Borgmesteri piffissaq tamaat qinigaammat, taamaattumillu borgmesteritut atorfini navianartorsiortinneqanngilluinnartoq eqqaamassallugu pingaaruteqarpoq.
Lyberth: Sisimiut kisimi ineriartorpoq
Gideon Lyberthip sanaartornermut aningaasaliissutit agguataarneqarnerannut tunngasoq suleqataajunnaarnerminut pissutaasutut Sermitsiamut oqaatigaa:
- Suleqatigiinni ilaasortaajunnaarnissannut pissutaanerpaasoq tassaavoq sanaartornermut aningaasaliissutit innuttaasut amerlassusaat naapertorlugit agguataarneqartarnissaannik aalajangerneq.
- Taamatut iliuuseqarneq nunaqarfiit nipaalluinnarlutik piuneerunneqarnissaannik kinguneqarsinnaavoq. Avannaata Kommunia siornatigut taamaaliortarsimavoq, maannali nunaqarfiit inoqarfiillu mikinerit ineriartortinneqarpallaarunnaatut takuneqarsinnaammat taamaaliortarunnaarpoq, Gideon Lyberth oqarpoq.
Suli ilaasortaasoq — tunuarnissaminulli nangaanngitsoq
Gideon Lyberth suleqatigiinnut ilaasortaajunnaaraluarluni Siumumi ilaasortaaginnarpoq:
- Qeqqata Kommuniani attaviitsutut ingerlaqqittussaagama suleqatigiinnut ilaasortaajunnaarpunga.
- Teknikkikkut ajornanngippat Siumumut sinniisuujuassaanga, kommunalbestyrelsimili amerlanerussuteqartut sulinerat naleqartitannut naapertuutinngimmat ajornanngippat aamma tunuarnissara nangaassutigissanngilara, Gideon Lyberth oqarpoq.
Ataatsimiititaliaq nutaaq pilersinneqartoq
Gideon Lyberth naapertorlugu illuatungiliuttut Demokraatit, Atassut Nalerarlu ataatsimiititaliamik nutaamik pilersitsinissamik, kommunip Tasersiap erngup nukinganik nukissiorfiata ineriartortinneqarnerani peqataatinneqarnissaanik qulakkeerinnittussamik isumaqatigiissuteqarfigisimavai:
- Qeqqata Kommuniani suliffeqarfiit Tasersiami suliniummut peqataatinneqarnissaat Inuussutissarsiornermut Aatsitassanullu Ataatsimiititap qulakkeertussaavaa.
- Suliniummik ingerlatsisut kisimik pineqanngillat, aammali biilileriffiit allallu sullissisut suliniummut attuumassuteqartut. Maannamut kommuni peqataatinneqarsimanngilaq, tamannali pisariaqartipparput innuttaasut suliffeqarfiillu suliniut iluaqutiginiassammassuk, Gideon Lyberth oqarpoq.
