Anna Wangenheim (D) Folketingimut qinersinermi taaneqarnerpaat tulliattut inissippoq 2358-inik taaneqarluni, IA Nalerarlu partiitut amerlanerussuteqartunik qinerneqarput taamaalillutillu Folketingimi ilaasortaatitaqarlutik.
Qinersinerup inernerisa saqqummiunneqarnerisa kingorna Sermitsiap Anna Wangenheim pulaarpaa:
Pingajuattut inissipputit. Qinersinermi inerniliunneqartut qanoq isumaqarfigaagit?
- Tamanna ilimagineqareersinnaavoq. Taamaappoq, qinerneqarnerannik sulilluarnissaannillu kissaallugit, oqarpoq.
- Taaguunneqarnerpaat tulliattut inissikkama soorunami ajuusaarutigaara, qinersinerilli taama aaqqissuussaapput, oqarpoq.
Anna Wangenheim Peqqissutsimut inunnullu Innarluutilinnut Naalakkersuisoq Naalakkersuisunut ilaasortaavoq.
Isumaqatiginninniarnerit pissanganartut
Jens-Frederik Nielsenip, Demokraatini Naalakkersuisunilu siulittaasup, aamma qinigaaffimmi ataatsimik qinigaatitaqannginnertik uggoraa.
Danmarkimi qinersinerup inernera aamma takkussimalerpoq. Saamerliit 84-inik, talerperliit 77-inik Moderaterillu 14-inik ilaasortaatitaqalerput. Taamaalilluni saamerliit talerperliilluunniit Moderaterne peqataatinnagit naalakkersuisunngortitsisinnaanngillat.
Danmarkimi qinersinerup inernera Naalakkersuisut siulittaasuattut qanoq isumaqarfigaajuk?
- Isumaqarpunga aamma assigiinngitsorpassuarnik isumaqartoqartoq. Kisianni isumaqatigiinniarnerit pissanganartut ingerlanneqartussanngorput. Neriuppungali naalakkersuisooqatigiilertussat Kalaallit Nunaannut ajunngitsumik isiginnittaasillit pissasut, Jens-Frederik Nielsen oqarpoq.
Tassa kalaallit Folketingimi ilaasortaatitaat marluk Naleqqamut, taakku 24,6 procentinit taaneqartut, IA-lmullu 28,6 procentinit taaneqartunut tunniunneqarput.
Qarsoq Høegh-Dam (N) 4615-inik taaneqarluni, Naaja H. Nathanielsenilu (IA) 1953-inik taaneqarluni, taakku Folketingimi ilaasortanngorput.
